viernes, 17 de abril de 2026
Nota de prensa del Gabinete de Comunicación del PPdeG:
O Parlamento de Galicia aprobou o Mandato Marco da Corporación de Radio Televisión de Galicia, o instrumento de orientación estratéxica para desenvolver o servizo público audiovisual de Galicia, adaptándoo aos cambios tecnolóxicos, económicos e usos sociais que impoñen a evolución da sociedade da información e do coñecemento, as políticas audiovisuais europeas e nacionais e as directivas comunitarias de servizos audiovisuais e a Axenda Dixital 2020.
O portavoz do Grupo Popular para asuntos relacionados coa CRTVG, Agustín Baamonde, lamentou que os grupos da oposición rexeitaran apoiar este Mandato Marco sen presentar proxecto alternativo de televisión e coa única escusa de que non tiveron tempo para elaborala cando veñen esixindo toda esta lexislatura a necesidade de desenvolver a Lei de medios de comunicación públicos de Galicia.
O Mandato Marco aprobado polo Pleno do Parlamento terá unha vixencia de nove anos. Transcorrido ese prazo, no caso de non aprobarse un novo mandato ao termo da súa vixencia, considerarase prorrogado ata dita aprobación. Porén, ao longo da súa vixencia, poderá ser revisado se así o decide o Parlamento de Galicia á luz de cambios no modelo de financiamento, na tecnoloxía ou como consecuencia de alteración substancial dos ámbitos de produción.
A través deste Mandato Marco, o Parlamento de Galicia desenvolverá as funcións de control da Corporación RTVG mediante o nomeamento dos membros do Consello de Administración; o nomeamento e, se é o caso, revogación do seu director; o coñecemento do informe anual sobre a execución e resultado do contrato programa, que fixará cada tres anos os obxectivos específicos a desenvolver pola corporación e o seu financiamento; e o control da xestión e do cumprimento da función de servizo público a través da Comisión Permanente non lexislativa de Control da Corporación RTVG.
Entre os obxectivos xerais de servizo público da Corporación RTVG figura a produción, edición e difusión dun conxunto de canles de radio, de televisión e de servizos de información en liña con programacións diversas e equilibradas para todo tipo de público, así como a promoción e dinamización da lingua galega, o reforzamento da identidade de Galicia, a promoción da cultura galega e o impulso da súa industria audiovisual. Ademais, contribuirá ao desenvolvemento da Sociedade da Información, fomentará o pluralismo, o debate democrático, o espírito crítico e a participación dos cidadáns no desenvolvemento político, social, económico e cultural de Galicia.
Ademais, a Corporación da RTVG rexerase polos principios de obxectividade e imparcialidade; veracidade; neutralidade informativa e independencia; liberdade de expresión e pluralismo; e pluralidade e diversidade política. Outorgará prioridade á información, que constituirá o eixe fundamental da súa oferta, ao tempo que se fixa como mínimo o obxectivo do 50 por cento de produción propia interna.
Respecto do financiamento da Corporación de RTVG, o Mandato Marco establece que será un sistema mixto, mediante a percepción das compensacións polo cumprimento da misión de servizo público e os ingresos e rendemento das súas actividades e da participación no mercado da publicidade.
Sobre o persoal, a Corporación adoptará as medidas necesarias para que o acceso ao desempeño das prazas do seu cadro de persoal se realice exclusivamente a través de procedementos que garantan o cumprimento dos principios de igualdade, mérito e capacidade.
O FIV de Vilalba volverá reunir na localidade lucense unha programación destacada da escena independente e alternativa estatal, cun cartel no que figuran nomes como Carlos Ares, Alcalá Norte, La M.O.D.A. e Ángel Stanich, xunto a outras propostas moi presentes no panorama actual como Repion, Puño Dragón, Celia Becks, Futuro Alcalde, Grande Osso e Rapariga DJ. A boa resposta do público nas últimas semanas confirma, ademais, a gran acollida desta edición, coa previsión de que Vilalba volva encherse de ambiente festivalero a próxima fin de semana. A programación do FIV de Vilalba desenvolverase entre o Escenario Vibra Mahou, o Escenario #Fiver by Lactalis e a Zona DJ, consolidando un formato que combina os grandes concertos nocturnos coa actividade diúrna do sábado.
Galicia sitúase como a comunidade autónoma con menor porcentaxe de pacientes que agardan máis de 60 días por unha consulta co especialista. Así o referendan os datos publicados polo Ministerio de Sanidade sobre listas de espera no Sistema Nacional de Saúde a peche de 2025. Segundo os datos, en decembro de 2025 a comunidade galega situouse como a cuarta rexión española con mellores tempos medios de espera no ámbito das primeiras consultas. Neste eido, o Servizo Galego de Saúde rexistrou unha media de 63 días de espera, fronte aos 102 do Sistema Nacional de Saúde. Estas cifras reflicten que os galegos esperan 39 días menos para acceder a unha consulta co especialista que a media dos españois.
