lunes, 27 de octubre de 2025
Nota de prensa del Gabinete de Comunicación de la Xunta de Galicia:
O XX Festival de Cine Internacional de Ourense (OUFF) foi o escenario da presentación do novo catálogo 'Films from Galicia' 2016, editado pola Consellería de Cultura, Educación e Ordenación Universitaria a través da Axencia Galega das Industrias Culturais (Agadic) co obxectivo de promover a produción cinematográfica e televisiva galega nos principais mercados internacionais do sector.
Participaron nesta presentación o director da Agadic, Jacobo Sutil; a concelleira de Cultura de Ourense, Belén Iglesias, e a directora do OUFF, Nora Sola. Jacobo Sutil foi o encargado de debullar as principais características desta publicación, que reúne información dun total de 57 títulos de cinema e televisión e para a que se conta coa colaboración do Instituto Galego de Promoción Económica (Igape) a través do programa de promoción internacional do audiovisual galego que manteñen ambas as entidades.
'Films from Galicia' é precisamente a marca conxunta coa que a industria audiovisual galega se presenta cada ano en feiras tan relevantes como o MIPCOM, MIPTV e Marché du Filme de Cannes (Francia), o European Film Market da Berlinale ou Ventana Sur de Bos Aires. Como explicou o director da Agadic, en todos estes mercados distribúese o catálogo coas últimas producións galegas, de xeito que se reflicte unha imaxe común orixinal, competitva e moderna, ao tempo que se deixa testemuño da gran variedade da oferta galega tanto a nivel de temáticas como de xéneros ou de formatos. Búscase tamén difundir Galicia como escenario de rodaxe cun gran potencial paixasístico e patrimonial, así como dar conta da gran calidade artística e técnica dos profesionais que conforman o noso sector.
Na súa edición de 2016, 'Films from Galicia' mantén a súa estrutura orixinal en catro grandes bloques: 'Pics' para longametraxes de ficción, 'Toons' para diferentes formatos de animación, 'Docs' para os documentais e 'TV' para series, telefilmes e programas televisivos. Os títulos aquí recollidos son os achegados polas propias empresas produtoras tras a convocatoria pública posta en marcha pola Agadic e dirixida a todas as compañías do sector en Galicia.
Así, 'Pics' recolle 19 longas cinematográficas de ficción, entre as que atopamos filmes xa estreados como 'Lobos sucios', película inaugural deste OUFF; 'Pozoamargo', coprodución galego-mexicana que acaba de gañar o premio á mellor película na sección 'Nuevas Olas' do Festival de Cine Europeo de Sevilla; 'O descoñecido' ou 'A praia dos afogados', xunto con outras fitas xa rematadas e a piques de chegar ás pantallas, como 'Migas de pan', 'María e os demais' ou 'As mimosas', e outras cinco en diferentes fases dos procesos de preprodución e produción ('Toro', 'Semana grande', 'A visitante', 'Sicixia' e 'A estación'). Todos os títulos acompáñanse da súa correspondente ficha informativa, reunindo destacados nomes do noso audiovisual non só a nivel de dirección (Simón Casal, Dani de la Torre, Anxos Fazáns, Oliver Laxe, Álex Sampayo, Ángel Santos, Carlos Sedes, Ignacio Vilar e Alfonso Zarauza), senón tamén nos apartados de produción e interpretación, entre outros.
Pola súa banda, a sección de animación está integrada por sete fitas e proxectos: 'Meigallos', que se presentará o día 20 no festival ourensán; 'Psiconautas', 'Maimiño', 'Cocorico', 'Día de mortos', 'Memorias dun home en pixama' e 'Tutu!'. No caso dos documentais, 'Films from Galicia' recompila 19 producións e proxectos, entre os que atopamos propostas de moi diversas temáticas e facturas como 'Cociñando na fin do mundo', 'O tesouro de Corcoesto', 'Os días afogados', 'Unitarias' ou 'A viaxe de Leslie'.
Por último, nos produtos televisivos relaciónanse series e programas tan coñecidos do gran público como 'Serramoura', 'Luci', 'Padre Casares', 'Hospital Real', 'O códice' ou 'Casamos' xunto con outros que están a piques de iniciar a súa emisión ('Urxencia cero') e dous proxectos ('Os fillos do sol' e 'Hierro'), ata completar 12 títulos.
A edición deste 'Films from Galicia', en inglés e tanto en formato físico como en liña no web da Agadic, refórzase cun vídeo promocional baixo a mesma marca, a través do que tamén se ofrece a imaxe dunha industria puxante e aberta ao mundo, pero sen renunciar tal e como expresou o director da Agadic ao compromiso de difusión da nosa cultura. Esta visión conxunta do sector audiovisual galego complementarase coa publicación do catálogo 'Shorts from Galicia' 2016, dedicado especificamente a promover as curtametraxes e para o que a Agadic abrirá proximamente a convocatoria de recepción de novos traballos.
Catálogo en liña: http://www.agadic.info/temas/agadic/gfx/publicacion/FFG16.pdf
Vídeo en YouTube: https://www.youtube.com/watch?v=B0ic1ptEn7w
Fotografía: Gabinete de Comunicación de la Xunta de Galicia
O Centro Dramático Galego colgará de novo o cartel de entradas esgotadas nas tres últimas funcións do seu espectáculo A serie clopen esta fin de semana no Salón Teatro de Santiago de Compostela, onde terá sido visto por arredor de 5500 persoas desde a súa estrea o pasado 11 de setembro. Tras os 33 pases ofrecidos na sede da compañía da Xunta, tamén completando as butacas dispoñibles en varias ocasións, o espectáculo iniciará a finais de mes unha xira que o levará a outros cinco escenarios de Galicia e Portugal. Así, a proposta dirixida por Pablo Reboleiro representarase o 30 de outubro no Teatro Académico de Gil Vicente de Coímbra como parte da programación da Mostra Galiza Coimbra 2025, organizada polos colectivos Cena Lusófona e A Escola da Noite e que conta co apoio económico da Consellería de Cultura, Lingua e Xuventude para ofrecer unha escolma de producións escénicas galegas, entre outras moitas actividades artísticas e formativas.
As empresas galegas que empregan Intelixencia artificial son xa o 15,7%, tras experimentar un crecemento do 51,1% no último ano. Crece tamén o uso do Cloud Computing, que pasou do 31,5% ao 38,2% no mesmo período de tempo. Son datos da enquisa sobre o uso das TIC e do comercio electrónico nas empresas 2024/2025, publicada hoxe polo Instituto Nacional de Estatística (INE) e que constatan o crecemento sostido das tecnoloxías innovadoras no tecido produtivo galego. Outro dos indicadores do grao de dixitalización das empresas galegas é a incorporación dos especialistas TIC. O 13,1% das empresas de máis de 10 empregados conta con este perfil profesional, un 4% máis no último ano, o que a converte a Galicia na novena Comunidade Autónoma con máis proporción de especialistas TIC no tecido empresarial.
