miércoles, 29 de octubre de 2025
Nota de prensa remitida por el Gabinete de Comunicación de la Xunta de Galicia:
A nova edición do programa Venres nas librarías, promovido polas consellerías de Cultura e Educación, e de Economía e Industria, xunto coa Asociación Galega de Editores (AGE) e a Federación de Librarías de Galicia, ofrecerá máis de 80 actividades este ano, durante as fins de semana de outubro e de novembro, para promover o libro, incrementar o público lector e poñer en valor as autoras e os autores galegos.
Un total de 17 librarías das catro provincias serán o lugar de encontro de público lector, de libreiros e libreiras e de escritores e escritoras para dar a coñecer as novidades editoriais galegas a través de diferentes propostas. A programación da nova edición foi presentada hoxe polo secretario xeral de Cultura, Anxo Lorenzo; pola directora xeral de Comercio, Sol Vázquez; pola presidenta da Federación de Librarías de Galicia, Pilar Rodríguez; e polo editor Miguel Toval, en representación da AGE, nunha rolda de prensa que tivo lugar na Biblioteca Pública Ánxel Casal de Santiago de Compostela.
Segundo explicou o secretario xeral de Cultura, do 2 de outubro ata o 28 de novembro, as librarías converteranse nun espazo de encontro dos lectores e lectoras con escritores galegos que publicaron algunha obra no último ano. Nomes como os de Xesús Constenla, Afonso Eiré, Sérgio Tannus, Pedro Feijoo, María Reimóndez, Suso Lista e Andrea Barreira, entre outros, darán a coñecer os seus novos títulos a través de charlas, lecturas dramatizas e poéticas, presentacións musicais e, sobre todo, con propostas nas que se promoverá a participación activa de público de todas as idades.
Xunto coas editoriais e os escritores e escritoras, as librarías xogan un papel central neste programa. E é que, como afirmou Anxo Lorenzo durante a presentación do programa, un dos nosos obxectivos principais é reforzar o seu papel como axentes esenciais na consolidación do tecido cultural da sociedade galega. En outubro e novembro deste ano, Venres nas librarías chegará aos concellos de Vigo, Ourense, Lugo, Moaña, Santiago de Compostela, A Coruña, Narón, Foz, Lalín, Cee e Sanxenxo a través de encontros en librarías como Trama, Aenea, Nós, Couceiro, Káthedra, Cartabón, O Pontillón, Andel, Andel, Suévia, Day, Pedreia, Bahía, Librouro, Vagalume e Ler.
Como novidade nesta segunda edición, a programación ampliarase tamén aos sábados, con actividades dirixidas ao público máis novo e que xirarán arredor de obras como O valente coello que quixo soñar, de Miguel Ángel Alonso, publicado por Nova Galicia Edicións; Alegría!, de Sérgio Tannus, Unha viaxe polo mundo, de Maimiñas, ou Un conto do revés, de Fran Amil, editados por Galaxia.
Estes encontros cos libros en galego dos venres e sábados non só se cinguirán ás librarías, senón tamén ás redes sociais, co concurso Andel do agasallo. Cada semana, as persoas que participen deberán adiviñar, mediante diversas pistas, de que libro se está a fala. O lector ou lectora que o acerte levará de agasallo ese novo título editorial.
O concurso realizarase a través das contas de Twitter @conscultura co hashtag #andeldoagasallo e de Facebook (www.facebook.com/CulturaGalegaXunta).
A segunda edición de Venres nas librarías prolongarase durante os meses de febreiro e de marzo do ano que vén, nos que se programarán novas actividades arredor das publicacións máis recentes, para achegarlle a cidadanía o libro e a lectura a través dos últimos traballos das escritoras e dos escritores galegos.
Fotografía: Gabinete de Comunicación de la Xunta de Galicia.
Celebrouse o Día da Eurorrexión, centrado na cultura e celebrado na sede do Consello da Cultura Galega. A iniciativa intégrase no proxecto Nortear, promovida no marco do programa Interreg EspañaPortugal (POCTEP), con participación da Consellería de Cultura, Lingua e Xuventude, a Direção Regional de Cultura do Norte e a propia AECT da Eurorrexión. O evento sinalou máis de tres décadas de cooperación entre Galicia e o Norte de Portugal, reafirmando a importancia da cultura como ponte de entendemento e desenvolvemento compartido entre os dous territorios.
O Goberno galego aprobou e está a desenvolver unha Estratexia integral e pioneira para facer fronte á soidade non desexada, un fenómeno que afecta a unhas 170.000 persoas en Galicia e que se configura como un dos grandes desafíos sociais do noso tempo, ligado ao incremento da esperanza de vida.Dotada cun investimento sen precedentes de máis de 145 millóns de euros, a estratexia articúlase arredor de catro eixos principais de actuación: detección, sensibilización, prevención e intervención.
