Noticias

Más de 11.000 firmas reivindican la necesidad de divulgar la obra de Castelao en Galicia

Nota de prensa remitida por el Gabinete de Comunicación de la Federación Galiza Cultura:

Representantes da comisión promotora entregaron no rexistro do Parlamento Galego máis de 11.000 sinaturas que avalan a Iniciativa Lexislativa Popular “sobre o dereito ao coñecemento e a contemplación da obra de Castelao polo pobo galego”.

A presidenta Galiza Cultura -entidade que agrupa as asociacións culturais-, María Pilar García Negro, o secretario xeral de CIG-Ensino, Anxo Louzao, o presidente da Mesa pola Normalización Marcos Maceira, e membros de asociacións culturais como Mª Antonia Pérez, de O Galo, Alberte Ansede, da Fundación Manuel María, ou Xoán Carlos Garrido, de Vagalume entregaron no rexistro do Pazo do Hórreo as sinaturas que permitirán que Castelao sexa o protagonista dun debate parlamentario sobre a necesidade de visibilizar a súa obra e a súa biografía.

“A tres semanas de seren entregadas as medallas que levan o seu nome podemos dicir que Castelao continúa estando duplamente enterrado para a poboación galega. Queremos que se se utiliza o seu nome non sexa en van”, explicou María Pilar García Negro ao tempo que defendeu a urxencia de mostrar a súa obra ara que sexa coñecida e apreciada.

“Cómpre sacalo do enterramento duplo ao que está a ser sometido e ter en conta a actualidade do seu pensamento xa que o debate político que está a haber agora está perfectamente guionizado en moitas das páxinas que el escribiu”, engadiu García Negro que lamentou que boa parte da súa obra non estexa exhibida nin ao dispor do pobo galego. En especial, citou a obra “A derradeira lección do mestre”, que se atopa en Arxentina e da que se pide o retorno na propia ILP.

En canto ao resultado da tramitación parlamentar da ILP, García Negro mostrou a súa confianza en que “deputados e deputados se comporten como xente ilustrada e que fagan honra ao patriota, pensador e artista sen o cal ninguén estaría agora como representante no Parlamento galego”, dixo, destacando, neste caso que foi o propio Castelao o que “resgatou o Estatuto e conseguiu a súa tramitación parlamentaria e a aprobación nas Cortes”.

Cando se vai conmemorar en 2016 o centenario das Irmandades da Fala, García Negro lembrou que Castelao é un dos seus impulsores polo que reclamou tamén para el unha maior atención de cara ao vindeiro ano
A ILP demanda o “acceso público e aberto a través da rede de Internet a toda a súa obra dixitalizada para coñecemento e uso de todo o pobo galego” das case 4.000 obras da súa autoría. Desde a súa presentación pública, desde Galiza Cultura e as outras entidades promotoras desenvolvéronse actos por todo o país para buscar apoios e difundir o contido da ILP e, alén diso, a propia obra e figura de Castelao.

Nota de prensa remitida por el Gabinete de Comunicación del BNG:

Galiza Nova presentou o acto de homenaxe a Rosalía e Castelao que celebra na véspera do Día da Patria de xeito interrompido desde fai vinte anos, con intervencións políticas, musicais e que conclúe cunha ofrenda floral no Panteón dos Galego Ilustres.

Na presentación, o secretario xeral das xuventudes do Bloque, Alberte Mera, reivindicou a vixencia do seu discurso “porque denunciaban a dependencia de Galiza que impedía aproveitar os nosos recursos produtivos para xerar riqueza e emprego, deixando como saía a emigración, na época de Rosalía e na actualidade”.

“Por iso o seu pensamento segue vixente, e senón que llo pregunten aos máis de 100.000 mozos e mozas que emigraron desde que Feijóo chegou á Xunta”, explicou o Mera, quen subliñou que Rosalía e Castelao seguen a ser “símbolos para toda a mocidade na loita polos dereitos nacionais”.

O BNG parabeniza a Galiza Nova por vinte anos de “popularización” das figuras de Castelao e Rosalía. “É curioso que á mocidade deste país se lle prive de coñecer sen complexos o inmenso legado que nos deixaron”, denunciou o secretario de Organización, Bieito Lobeira, na presentación deste acto que completa a axenda de celebracións do Día da Patria, que este ano se conmemora cunha manifestación unitaria á que se suma a formación nacionalista.

Loberia subliñou que o Bloque adhírese a esta manifestación de unidade e confía sexa “unha gran demostración da vitalidade do pobo galego na defensa dos seus dereitos colectivos, o dereito a existir como suxeito político e a ter un papel protagonista no debate aberto do Estado español en relación cos dereitos dos pobos”.

Galiza é o país máis avellentado de Europa, mesmo con risco de despoboamento, e ten taxas “inadmisibles” de desemprego xuvenil. Neste contexto, a vía real para superar esta situación é “abrir unha vía propia, galega, democrática, popular e nacionalista”, subliñou Lobeira, quen fixo fincapé nas potencialidades e na capacidade produtiva de Galiza.

Neste sentido, confía que o 25 de Xullo sexa tamén unha demostración de que “o pobo galego existe, que ten dereitos e sabe exercelos” no marco desa manifestación unitaria, que o Bloque considera “un paso moi importante para articular unha estratexia propia, sen submisión a ningunha estrutura partidaria española ou allea a nós”.

En canto aos detalles do acto, Mera salientou a participación dos grupos Loaira e Poetarras na celebración no Parque de Santo Domingo de Bonaval para, ademais das intervencións políticas, “homenaxear con humor, música, arte e cultura” ás figuras “patrióticas” de Rosalía e Castelao.

O responsable de Galiza Nova lamentou a falta de cooperación por parte do Concello de Santiago que, nunha decisión sen precedentes, obriga a organización xuvenil a depositar unha fianza de mil euros para poder celebrar o acto. “Mil euros de fianza para unha asociación xuvenil como Galiza Nova é difícil de afrontar, e falamos dun acto dunha hora nun espazo público feito pola mocidade e nunca tivemos taxa algunha de fianza”, lamenta Mera.