domingo, 25 de octubre de 2026
Nota de prensa remitida por el Gabinete de Comunicación de la Xunta de Galicia:
O Resurrection Fest presentou en Santiago o programa completo da súa décima edición, que se desenvolverá en Viveiro do 15 ao 18 de xullo coa participación dunhas 80 bandas, entre as que se atopan grandes nomes internacionais do hardcore, punk e metal como Motörhead, Korn e Refused. O festival será, ademais, a única oportunidade de ver este ano en España os tres cabezas de cartel e outros coñecidos grupos internacionais como In Flames ou Black Label Society.
Esta exclusividade na programación, así como a súa especialización musical, teñen consolidado o evento lucense como unha das principais citas europeas e a máis importante de España no seu xénero. Así se puxo de manifesto esta mañá na presentación oficial que tivo lugar na Cidade da Cultura e na que interviñeron Jacobo Sutil, director da Axencia Galega das Industrias Culturais (Agadic); María Loureiro, alcaldesa de Viveiro; Santiago Miguélez, brand manager de Estrella Galicia; e Iván Méndez e David Méndez, director e subdirector do Resurrection Fest, respectivamente.
Na súa intervención, o director da Agadic subliñou que o encontro é un dos 12 festivais profesionais de música que contan co apoio económico da Consellería de Cultura, Educación e Ordenación Universitaria a través da convocatoria de subvencións 2015 da Agadic, que precisamente onte fixo pública a relación de beneficiarios e contías outorgadas. De acordo con esta resolución, o Resurrection percibirá un total de 41.936,57 euros, situándose xunto co PortAmértica como o festival que contará coa maior dotación.
Jacobo Sutil incidiu, así mesmo, na repercusión deste tipo de eventos musicais, que vai máis alá da súa faceta lúdica para funcionar como motores da industria musical galega, así como da dinamización turística e económica dos lugares que os acollen. Este é o caso de Viveiro que, segundo as cifras que manexa a organización do Resurrection, recibirá do 15 ao 18 de xullo unhas 55.000 persoas chegadas de máis de 30 países, cun impacto económico en toda a comarca da Mariña estimado en 4,5 millóns de euros. O desenvolvemento do evento xera, así mesmo, 300 empregos directos e arredor de 500 indirectos.
Os tres escenarios desta décima edición, que se abrirá o día 15 cunha festa de presentación de entrada gratuíta, acollerán tamén outras importantes bandas internacionais como Fear Factory, Backyard Babies, Satanic Surfers, Behemoth, Children Of Bodom, Heaven Shall Burn, Soulfly, Comeback Kid, Danko Jones, Biohazard ou Cannibal Corpse, ademais dos navarros Berri Txarrak e dos madrileños Toundra. Haberá lugar tamén para a escena local, que estará representada polos tres grupos gañadores do Band Contest, ao que se presentaron 300 candidatos.
Ademais, entre as novidades deste ano, a organización pon a disposición dos nenos e as nenas o espazo Resukids, onde os máis pequenos poderán gozar da experiencia do festival a través do xogo e a diversión mentres os maiores se achegan aos concertos.
Os billetes e abonos para este X Resurrection Fest, que ten xa máis do 80 por cento das súa entradas vendidas en 33 países diferentes, poden adquirirse en liña a través do web http://www.resurrectionfest.es/entradas/.
Fotografía: Gabinete de Comunicación de la Xunta de Galicia
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
