lunes, 26 de octubre de 2026
Nota de prensa de la Academia Galega do Audiovisual:
Os Fenómenos, cun total de 4 premios, e A Esmorga con 6, comparten o triunfo na XIII Edición dos Premios Mestre Mateo. Os Fenómenos, de Alfonso Zarauza, acadou os premios a Mellor Longametraxe, Mellor Guión, Mellor Dirección e Mellor Interpretación Feminina de Reparto. A Esmorga, de Ignacio Vilar, triunfou especialmente nas categorías técnicas, levándose os premios a Mellor Interpretación Masculina Protagonista, Mellor Dirección de Arte, Mellor Dirección de Fotografía, Mellor Música Orixinal, Mellor Vestiario, Mellor Maquillaxe e Perruquería. O outro filme favorito, Schimbare, finalmente acadou os galardóns de Mellor Dirección de Produción e Mellor Son.
Outro dos grandes gañadores da noite foi Antonio Durán Morris, que acadou os dous premios polos que competía: Mellor Interpretación Masculina Protagonista por A Esmorga e Mellor Interpretación Masculina de Reparto por Códice.
A XIII edición dos Premios Mestre Mateo arrancou agradecendo o apoio do público cunha franca intervención do presentador Roberto Vilar. Tras un monólogo breve e divertido, que deixou clara a rapidez que caracterizaría o evento, Vilar destacou o bo momento polo que pasa o audiovisual galego da man de producións como Serramoura, Os Fenómenos e A Esmorga.
A conta de premios de A Esmorga, que acadaría un total de 6 premios, arrincou puntual cos galardóns a Mellor Maquillaxe e Perruquería e a Mellor Música Orixinal, aos que rapidamente se sumaron os de Mellor Vestiario e Mellor Dirección de Arte.
Por outra banda, un dos puntos clave da gala foi o agradecemento ao público polo seu apoio á ficción galega, que se materializou nun vídeo-homenaxe aos fans, invitados de honra ao evento. Este pequeno recoñecemento continuou coa entrega do galardón á Mellor Serie de Televisión por parte dun fan escollido pola Academia.
O galardón á Mellor Serie de Televisión foi para Serramoura, acompañado dun interminable aplauso do público, aínda que esta foi a única vez que o equipo da serie subiu ao escenario para recoller un premio.
Notorio foi tamén o aplauso para o equipo de El Método Sueco, gañadores do Mestre Mateo á Mellor Serie Web, que reivindicaron o papel motor dos máis novos no audiovisual galego e salientaron a gran cantidade de webseries que se fan en Galicia con moitas ganas e sen cobrar un peso.
Continuando coas reivindicacións, Isabel Risco fixo a súa aparición no escenario con cadeas para protestar, ironicamente, sen ningunha reivindicación, arrincando as risas do público. Tras este pequeno sketch, chegou o momento do discurso do presidente da Academia Galega do Audiovisual, Antonio Mourelos. Tras catro anos ao fronte da Academia, Mourelos remata o seu mandato coa vista posta nun futuro cheo de cambios por vivir e infinidade de retos. O presidente lembrou o papel necesario do sector nun discurso marcado polos agradecementos, en especial ao público máis fiel, un público sen complexos, que acompañou ao audiovisual galego ao longo destes trinta anos.
Tras o discurso, Mabel Rivera entregou, cun longo e emotivo abrazo, o premio de honra Fernando Rey á actriz Fely Manzano, a súa compañeira de rodaxe na clásica serie da TVG Pratos Combinados. No seu discurso, Fely Manzano, do mesmo xeito que na cerimonia de nomeados da Academia, aproveitou o momento para pedir que non se esqueza á súa xeración, ademais de agradecer ao público o seu apoio ao sector. O público asistente ao evento acompañou á actriz cun clamoroso aplauso no seu grito de Viva o audiovisual galego!.
Outro dos momentos destacados da gala foi a dedicatoria do Colectivo Audiovisual Lentes Diverxentes, gañadores do premios ao Mellor Documental por Angrois no esquecemento. O reducido equipo do filme, formado unicamente por catro persoas, dedicou o premio ás vítimas do accidente e aproveitou o momento para reivindicar a petición dos familiares de que se faga xustiza e se busque a verdade.
Finalmente, os recentes gañadores dun Premio Goya, Nerea Barros e Javier Gutierrez, foron os encargados de entregar o premio á Mellor Longametraxe, que recaeu en Os Fenómenos, de Alfonso Zarauza.
Isto supuxo o punto final a uns premios que son a viva mostra de que na sociedade galega existe un audiovisual de calidade, que ademais atravesa un bo momento. En palabras do presidente da Academia: un audiovisual creativo, rico e con futuro que segue loitando por mellorar e abrir as súas fronteiras e colocarnos no mundo.
Fotografía: Academia Galega do Audiovisual
Máis información: https://www.academiagalegadoaudiovisual.com/
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
