jueves, 9 de abril de 2026
Nota de prensa remitida por el Gabinete de Comunicación de la Xunta de Galicia:
A Xunta de Galicia, a través da Consellería de Cultura, Educación e Ordenación Universitaria, súmase á celebración do centenario do nacemento de Eugenio Granell. As homenaxes no día do aniversario do artista comezaron co acto de descuberta dunha placa conmemorativa en Santiago de Compostela, no que participou o secretario xeral de Cultura, Anxo Lorenzo.
Coa descuberta desta placa no número 6 da rúa da Caldeirería, onde Eugenio Granell viviu a primeira etapa da súa vida xunta coa súa familia facemos un acto de homenaxe colectiva a un artista que marcou a historia cultural desta cidade e de Galicia, dixo o secretario xeral. Pero introducimos, ademais, un elemento na paisaxe urbana de Compostela para a acordanza de todos aqueles que cada día transitan as súas rúas, facendo presente para o porvir a lembranza de Granell, engadiu.
Anxo Lorenzo tamén se referiu a Granell como un artista que quixo ofrecer sempre unha mirada nova e que explorou nas diferentes linguaxes, se ben foi por riba de todo pintor. Bebeu do surrealismo engadiu para definirse nunha idea e nunha proposta plástica propia e inconfundible.
Xunta co secretario xeral de Cultura tamén participaron no acto o alcalde de Santiago de Compostela e copresidente do Padroado da Fundación Eugenio Granell, Ángel Currás; Xerardo Estévez, ex alcalde de Santiago de Compostela; así como os membros do Padroado e familiares e amigos achegados ao artista.
A celebración do centenario do artista prolongarase ata a tarde, coa presentación do estudo e mais dunha proposta sonora das máis de duascentas anotacións musicais que deixou Granell no seu arquivo. O resultado deste proxecto pioneiro é o libro-disco Miniaturas de Eugenio Granell. Música revelada, que se dará a coñecer ás 19:30 horas na sede da Fundación Granell, en Santiago de Compostela.
O Carballo Interplay desenvolverá do 16 ao 19 de abril no Mercado de Carballo a súa 13ª edición cun programa de 32 actividades arredor da creación dixital contemporánea, das series en pequeno formato, a cultura de internet e a reflexión sobre os novos modos de comunicar na rede. O certame reforza especialmente este ano a presenza do galego como lingua de creación, conversa e pensamento no ecosistema dixital, cunha programación específica arredor dos contidos no noso idioma nas redes sociais, accións formativas para a mocidade, premios dirixidos a recoñecer o talento que crea na nosa lingua e novas oportunidades para a produción de proxectos audiovisuais nados no ámbito dixital.
A Cidade da Cultura celebrará o Día do Circo o vindeiro 19 de abril co espectáculo 'Sen patrón', da compañía galega Pistacatro, recoñecida co Premio Nacional 2025 desta disciplina artística. A proposta terá lugar no Xardín do Teatro, ás 17,00 horas, con entrada libre e de balde. Así, o Día do Circo convértese nun momento para celebrar tamén a chegada da primavera cunha proposta escénica aberta, festiva e accesible para todo tipo de públicos, que combina cabaré, números aéreos e malabares cunha dramaturxia que reivindica tanto técnicas circenses tradicionais como contemporáneas. Pistacatro é unha das compañías e produtoras de circo máis relevantes das artes vivas de Galicia, que traballa a prol da profesionalización do circo na Comunidade, impulsando as carreiras de artistas e traballadores do sector.
