jueves, 9 de abril de 2026
Nota de prensa remitida por el Gabinete de Comunicación de la Xunta de Galicia:
A Consellería de Cultura, Educación e Ordenación Universitaria leva o venres 13 de abril un concerto de homenaxe a Celso Emilio Ferreiro a Celanova, vila natal do escritor, no marco do programa de actividades que o departamento dirixido por Xesús Vázquez Abad está a promover para celebrar o centenario do nacemento do poeta. Actuacións musicais en directo, recitais e proxeccións audiovisuais difundirán os versos do poeta de Celanova, nunha gala que será presentada pola actriz María Mera e que terá lugar no Auditorio Municipal de Ilduara de Celanova (AMIC) a partir das 20:00 horas.
O concerto, que está aberto á participación de toda a cidadanía con carácter gratuíto, foi presentado esta mañá polo secretario xeral de Cultura, Anxo Lorenzo; o director da Axencia Galega das Industrias Culturais (Agadic), Juan Carlos F. Fasero; o alcalde de Celanova, Antonio Mouriño; e dous dos artistas que actuarán na homenaxe, a cantante María do Ceo e o cantautor Luís Emilio Batallán, nunha rolda de prensa que tivo lugar na Cidade da Cultura.
Segundo afirmou Anxo Lorenzo, o concerto inclúe espectáculos musicais, recitais en directo e diversas proxeccións audiovisuais que permitirán afondar na achega que Celso Emilio Ferreiro lle ofreceu a Galicia tanto no plano creativo como para a construción social colectiva. O director da Agadic detallou o contido da homenaxe, que contará coas actuacións musicais de María do Ceo, de Luís Emilio Batallán e de Davide Salvado, así como con recitais poéticos a cargo do escritor Luís González Tosar e mais de escolares de Celanova.
Durante todo o acto tamén se proxectarán diversos vídeo-poemas que terán como protagonista a obra de Celso Emilio Ferreiro a través da voz de diferentes persoeiros, entre eles María do Carme Krückemberg, Isaac Díaz Pardo, Miro Casabella, Míchel Salgado, Manuel Manquiña, Ibrahim Lang e mais a muller e a filla do poeta homenaxeado, Moraima e Isabel Ferreiro, respectivamente.
A Consellería de Cultura e Educación e o Concello de Celanova promoven este concerto homenaxe a Celso Emilio Ferreiro, que tamén conta coa colaboración da Fundación Celso Emilio Ferreiro e da Deputación Provincial de Ourense.
Segundo confirmou o secretario xeral de Cultura, o concerto deste venres en Celanova non vai ser único, xa que o mes de xuño a consellería tamén celebrará en Vigo outro centro de referencia na vida de Celso Emilio Ferreiro un espectáculo musical de homenaxe ao poeta.
Finalmente, Anxo Lorenzo recordou que este 2012, Ano Celso Emilio Ferreiro, ten que ser un revulsivo para a popularización da obra do poeta e para favorecer un afondamento na reflexión sobre a súa traxectoria vital e profesional. Nesa dirección engadiu desde a Consellería de Cultura e Educación faremos todos os esforzos para darmos cumprimento a estes obxectivos.
As persoas interesadas en asistir ao concerto poden facelo con confirmación previa no enderezo electrónico secretaria.xeral.cultura@xunta.es ou no teléfono 981 544 814.
Fotografía: Xunta de Galicia
O Carballo Interplay desenvolverá do 16 ao 19 de abril no Mercado de Carballo a súa 13ª edición cun programa de 32 actividades arredor da creación dixital contemporánea, das series en pequeno formato, a cultura de internet e a reflexión sobre os novos modos de comunicar na rede. O certame reforza especialmente este ano a presenza do galego como lingua de creación, conversa e pensamento no ecosistema dixital, cunha programación específica arredor dos contidos no noso idioma nas redes sociais, accións formativas para a mocidade, premios dirixidos a recoñecer o talento que crea na nosa lingua e novas oportunidades para a produción de proxectos audiovisuais nados no ámbito dixital.
A Cidade da Cultura celebrará o Día do Circo o vindeiro 19 de abril co espectáculo 'Sen patrón', da compañía galega Pistacatro, recoñecida co Premio Nacional 2025 desta disciplina artística. A proposta terá lugar no Xardín do Teatro, ás 17,00 horas, con entrada libre e de balde. Así, o Día do Circo convértese nun momento para celebrar tamén a chegada da primavera cunha proposta escénica aberta, festiva e accesible para todo tipo de públicos, que combina cabaré, números aéreos e malabares cunha dramaturxia que reivindica tanto técnicas circenses tradicionais como contemporáneas. Pistacatro é unha das compañías e produtoras de circo máis relevantes das artes vivas de Galicia, que traballa a prol da profesionalización do circo na Comunidade, impulsando as carreiras de artistas e traballadores do sector.
