sábado, 31 de octubre de 2026
Nota de prensa remitida por el Gabinete de Comunicación de la Xunta:
O conselleiro de Cultura e Turismo, Roberto Varela Fariña, asinou na Cidade da Cultura co presidente da Fundación Otero Pedrayo, Víctor Freixanes, un convenio de colaboración dotado con 21.000 euros que ten como obxectivo a conservación e difusión dos fondos albergados nesta institución. En total, traballarase sobre 938 documentos que integran os fondos da Fundación Otero Pedrayo, unha actuación que procura como fin principal o mantemento e promoción da memoria colectiva sobre o escritor ourensán.
O convenio asinado ecolle a vontade da Fundación Cidade da Cultura de Galicia e da Fundación Otero Pedrayo de promover accións dirixidas a recuperar, conservar e facilitar o acceso e o estudo do patrimonio bibliográfico e documental da Fundación Otero Pedrayo, co fin de contribuír á súa difusión á sociedade. Será a través da descrición bibliográfica, reconversión a formato Marc (rexistro catalográfico lexible por máquina) e a formato dixital dos documentos conservados no arquivo e na biblioteca da Fundación Otero Pedrayo.
Os resultados deste proceso de descrición bibliográfica e de dixitalización poñeranse a disposición das dúas institucións e para a súa inclusión nos fondos dixitais e bibliográficos da Biblioteca de Galicia. O obxectivo é favorecer a súa utilización e difusión pública, de xeito que se permita a consulta dos documentos mediante as novas tecnoloxías da comunicación.
Esta colaboración enmárcase nos acordos alcanzados pola Consellería de Cultura e Turismo con institucións galegas que albergan legados de importancia para protexer e difundir o seu patrimonio bibliográfico e documental. O convenio asinado coa Fundación Otero Pedrayo pon de manifesto a importancia dos fondos que alberga esta institución, un tesouro bibliográfico e documental, único e singular do patrimonio galego. Tamén se destaca neste documento o importante papel que segue a xogar esta institución na conservación e difusión da cultura galega.
Será a Fundación Otero Pedrayo a encargada da descrición bibliográfica e da dixitalización dos fondos, un proceso que será sufragado pola Fundación Cidade da Cultura de Galicia cun total de 21.000 euros. En total, traballarase sobre 938 documentos que integran os fondos da Fundación Otero Pedrayo.
Máis en detalle, procederase á conversión a formato Marc de 136 descricións bibliográficas das monografías depositadas na Biblioteca Otero Pedrayo (113 do século XVIII, 14 do XVII e 9 do século XVI), de 382 das publicacións periódicas, memorias e anuarios e 416 descricións bibliográficas analíticas das colaboracións en prensa realizadas por Ramón Otero Pedrayo. Ademais, procederase á dixitalización de monografías de fondo antigo da biblioteca do escritor. Trátase de catro obras do século XVI que suman un total de 2.250 páxinas.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
