domingo, 19 de abril de 2026
Nota remitida por el Gabinete de Comunicación de la Xunta de Galicia:
O Centro Coreográfico Galego (CCG) viaxa a Madrid onde o xoves 24 de febreiro abre a programación do ciclo Cartografía de la Danza co seu espectáculo Etheria, a viaxe soñada. A unidade de danza da Agadic (Axencia Galega das Industrias Culturais) presentará no Teatro de Madrid, espazo especializado na exhibición coreográfica, esta peza creada e dirixida por Mercedes Suárez que une danza e videocreación para se achegar á historia da muller que puido ser a primeira peregrina galega.
O CCG foi convidado a participar nesta oitava edición da mostra que organiza ata o 6 de marzo a produtora Artibus, xestora do Teatro de Madrid, co obxectivo de ofrecer un panorama da actual escena coreográfica española nos seus máis diversos estilos: danza clásica, contemporánea, urbana e flamenco, entre outros. A do Centro Coreográfico será a primeira das sete propostas que ofrece esta carteleira, na que figuran así mesmo as compañías Lapedroche, Pilar Vilanueva Lan1, Provisional Danza ou Dani Pannullo.
En Etheria, a viaxe soñada, Mercedes Suárez deseñou unha peza audaz e dinámica pola súa capacidade de combinar de xeito fluído as representacións da historia milenaria con elementos da máis cotiá actualidade, a simboloxía clásica cos patróns máis contemporáneos, reivindicando así o espírito universal e atemporal das grandes viaxes ao longo da historia da humanidade e da mitoloxía.
A montaxe, que interpretan 12 bailaríns e bailarinas de distintas procedencias xeográficas e disciplinas, conta igualmente coas achegas de destacados profesionais e artistas galegos, como é o caso da vocalista Rosa Cedrón, quen interpreta en directo un dos temas do espectáculo. Outras colaboracións destacadas son as de Isaac Garabatos, compositor da música executada polo grupo ISGA Collective; Antonio F. Simón, deseñador da escenografía e iluminación; e Marcos Garabán, do vestiario.
A acción sitúase na viaxe de volta de Oriente Medio a Gallaecia da protagonista. Etheria sinte o impulso interior de emprender unha viaxe ao exterior, empurrada pola súa ousadía e polas súas convicións na fe e nas máximas de Prisciliano, personaxe que se adiviña na trama. Á vez, Prisciliano protéxea no seu periplo das tentacións terreais, sempre personificadas na figura simbólica do sátiro, coa que se fai un aceno ás relacións humanas establecidas na peregrinación e que transcenden o seu espírito relixioso.
A bailarina Irene Rubio interpreta por medio da danza todas as dimensións de Etheria: a súa crenza no movemento priscilianista, a súa procedencia nobre, o seu forte carácter e a súa instruída formación. Todo o corpo de baile (que completan Ariel Caramés, Miguel Ángel Ponte, Elena Chamorro, Fátima Fernández, Beatriz Garrido, Ástrid Molinero, Lucía Antonella Sampieri, Pablo Aradillas, Juan Miguel Hernández, Pastor Rodríguez e Carlos Ugarriza) leva a cabo unha actuación que une plasticidade, precisión e sentimento en secuencias coreográficas de gran forza, tanto nas escenas corais coma nos pas de deux que se executan.
A montaxe audiovisual que se proxecta no fondo do escenario que aparece practicamente limpo para a súa total entrega ao baile contribúe de xeito decisivo á construción da paisaxe de imaxes e localizacións que evoca o argumento e que traslada o espectador ás distintas latitudes xeográficas que visita Etheria.
O FIV de Vilalba volverá reunir na localidade lucense unha programación destacada da escena independente e alternativa estatal, cun cartel no que figuran nomes como Carlos Ares, Alcalá Norte, La M.O.D.A. e Ángel Stanich, xunto a outras propostas moi presentes no panorama actual como Repion, Puño Dragón, Celia Becks, Futuro Alcalde, Grande Osso e Rapariga DJ. A boa resposta do público nas últimas semanas confirma, ademais, a gran acollida desta edición, coa previsión de que Vilalba volva encherse de ambiente festivalero a próxima fin de semana. A programación do FIV de Vilalba desenvolverase entre o Escenario Vibra Mahou, o Escenario #Fiver by Lactalis e a Zona DJ, consolidando un formato que combina os grandes concertos nocturnos coa actividade diúrna do sábado.
Galicia sitúase como a comunidade autónoma con menor porcentaxe de pacientes que agardan máis de 60 días por unha consulta co especialista. Así o referendan os datos publicados polo Ministerio de Sanidade sobre listas de espera no Sistema Nacional de Saúde a peche de 2025. Segundo os datos, en decembro de 2025 a comunidade galega situouse como a cuarta rexión española con mellores tempos medios de espera no ámbito das primeiras consultas. Neste eido, o Servizo Galego de Saúde rexistrou unha media de 63 días de espera, fronte aos 102 do Sistema Nacional de Saúde. Estas cifras reflicten que os galegos esperan 39 días menos para acceder a unha consulta co especialista que a media dos españois.
