viernes, 2 de mayo de 2025
Nota de prensa remitida por el Gabinete de Comunicación de la Vicepresidencia de la Diputación Provincial de Lugo:
O vicepresidente da Deputación de Lugo, Antón Bao, inaugurou a mostra Galicia 25. Unha cultura para un novo século, un proxecto de carácter itinerante e interactivo que fai balance do progreso social e cultural de Galiza dende o ano 1983, data na que se fundou a entidade organizadora da exposición, o Consello da Cultura Galega. O Pazo de San Marcos acolleu este acto no que tamén participaron o presidente do Consello da Cultura Galega, Ramón Villares, o director territorial de Caixanova organismo colaborador-, Manuel García Miñaca, o representante dos tres comisarios da mostra, Henrique Monteagudo, e a directora do Museo Provincial de Lugo, Aurelia Balseiro.
Tal e como se explicou no acto de inauguración, a exposición está estruturada baixo os ítems Formas e espazos, Palabras, imaxes e sons e Fíos e desafíos. Das verbas dos tres comisarios de Galicia 25. Unha cultura para un novo século, - Víctor Freixanes, Henrique Monteagudo e Iago Seara- recollidas nunha publicación complementaria á mostra, extráese a esencia deste proxecto: a importancia e significación da cultura como elemento substancial da identidade do país e compoñente decisivo na configuración da Galicia da Autonomía. De feito, na súa intervención, Antón Bao destacou que esta mostra é un escaparate da cultura galega, a imaxe dun país en marcha que ten algo que dicir e quere dicilo, unha cultura e un idioma con capacidade para dialogar e interactuar con outras culturas e outros idiomas en igualdade de condicións, sen arrogancias e sen complexos.
A maiores, cómpre salientar tamén que este proxecto cultural abarca a arquitectura e a identidade, a cultural ambiental, os espazos de comunicación, o deseño e a industria, o valor do patrimonio, a creación, a sociedade do coñecemento, os sons do lugar, o territorio luminoso das palabras, a festa dos máis novos, o libro, as imaxes e a ficción, e, por último, as artes escénicas e as diferentes posibilidades e presenzas de Galiza no mundo. A exposición tamén inclúe un amplo programa de actividades que o propio Consello da Cultura Galega promoveu e desenvolveu en 2008 para conmemorar os seus primeiros 25 anos de vida.
A mostra, conformada por 25 módulos ou unidades temáticas, percorreu xa as cidades de Vigo, Pontevedra, Ferrol, Santiago de Compostela e Ourense. En Lugo, poderase visitar na Sala de Exposicións e nas galerías interiores do Pazo de San Marcos ata o vindeiro 19 de xullo.
A obra Hombre y joven marinero (1929), do poeta e artista Federico García Lorca e pertencente á colección da Fundación Pública Galega Camilo José Cela, formará parte da exposición internacional The First Homosexuals, que se inaugurará o 2 de maio no prestixioso espazo Wrightwood 659 de Chicago. Trátase dunha mostra que reúne máis de 250 obras que documentan as primeiras representacións artísticas da homosexualidade no panorama internacional posterior a 1869. A Fundación Camilo José Cela continúa así co seu labor de conservación, difusión e proxección internacional do seu valioso fondo artístico e documental, favorecendo o diálogo cultural arredor dunha das figuras máis senlleiras da literatura e da arte do século XX.
A figura e o legado de Alfonso Daniel Rodríguez Castelao será divulgada a través dunha decena de publicacións ao longo deste 2025, dentro das accións da programación do Ano Castelo, co que o Goberno galego conmemora o 75 aniversario dunha das figuras máis senlleiras de Galicia. Entre elas estarán 'Celebrando a Castelao. O artista polifacético', de Rubén de Lis, dúas edicións da emblemática obra teatral 'Os vellos non deben de namorarse', os discursos institucionais de Castelao (da man da Fundación Castelao) ou a dixitalización da documentación sobre o Estatuto de 1936 (en colaboración co Instituto Padre Sarmiento).
