viernes, 10 de abril de 2026
Nota de prensa remitida por el Gabinete de Comunicación de la Xunta de Galicia:
O presidente da Xunta, Alberto Núñez Feijóo, manifestou o seu firme compromiso de gobernar facendo do galeguismo e da democracia as dúas caras da nosa identidade, tal e como o concibiu o escritor, pensador e filósofo Ramón Piñeiro, ao que este ano se lle dedica o Día das Letras Galegas. Como presidente da Xunta quero ser un discípulo máis de Ramón Piñeiro. Gobernarei co mesmo compromiso galeguista que se Piñeiro tivera a oportunidade de facelo en pleno século XXI, aseverou o mandatario autonómico argumentando que o galeguismo e a democracia seguen a ser as dúas chaves do futuro.
Na súa intervención durante o acto de inauguración da exposición Ramón Piñeiro. Olladas no futuro, no que tamén participaron o conselleiro de Educación e Ordenación Universitaria, Jesús Vázquez, e o titular de Cultura e Turismo, Roberto Varela, Alberto Núñez Feijóo afirmou que dedicarlle o Día das Letras Galegas a Ramón Piñeiro é un acto de xustiza con nós mesmos. El é máis que un escritor, máis que un pensador, máis que un filósofo, asegurou o presidente da Xunta apuntando que Piñeiro traballou por facer do galeguismo un clima común máis que un reduto privado e que representa a toda unha xeración que fai do galeguismo cordial unha rede que mantén unido a todo un país.
Representa a unha xeración de intelectuais galegos e cosmopolitas que abren de par en par as portas do galeguismo para que deixe de ser unha leira illada e se converta na forza vital da nova autonomía, abondou Feijóo incidindo en que é unha xeración convencida de que a cultura e a poesía eran unha arma cargada de futuro naquela época ingrata de noites de pedra. Velaí Galaxia, en cuxo ronsel de estrelas moitas mulleres e homes do meu tempo albiscamos unha Galicia pletórica e unha lingua fresca que nos axudou a recuperar a nenez perdida e a apreciar o noso idioma como ferramenta de modernidade, agregou.
As palabras que nos deixou Ramón Piñeiro constitúen o fundamento dunha Galicia entendida como punto de encontro no que se atopan pasado, presente e futuro, precisou o xefe do Executivo autonómico sinalando que son a primeira pedra dun autogoberno concibido como casa común de todos os galegos.
Na súa intervención, Alberto Núñez Feijóo afondou na figura de Piñeiro destacando que o escritor e filósofo lancarao é unha síntese de democracia e galeguismo, nun tempo dixo-, no que non sempre eses conceptos ían da man. Piñeiro é un mentís aos agoiros dos crepúsculos das ideoloxías porque demostra que unha idea certeira pode provocar unha revolución e que unha idea certeira comunicada con tolerancia logra que esa revolución sexa pacífica e fecunda, aseverou Feijóo sinalando que a Galicia actual é consecuencia dun cambio que se forxa nesa pequena mesa camilla, que se fixo máis grande ata agrupar ao seu redor a todo un país.
Non hai moitos precedentes dun liderado intelectual baseado fundamentalmente na palabra dita máis que na escrita, engadiu, explicando que hai quen lle busca a Ramón Piñeiro un afastado parentesco socrático co que dixo non estar moi de acordo. A este respecto apuntou que mentres que a tradición fala dun Sócrates malhumorado e amigo da gloria, dun filósofo que creou unha escola e dun pasamento desgraciado, Ramón Piñeiro engaiola coa súa amabilidade e practica unha modestia conmovedora; moldea unha nacionalidade; e dinos adeus en medio do aprecio de todos e coa satisfacción de ollar no presente o que soñara no pasado, concluíu Feijóo.
Os sistemas de almacenamento enerxético resultan fundamentais para dar estabilidade ao sistema, tanto desde o punto de vista técnico como económico, grazas a súa contribución á resiliencia da rede e na redución das oscilacións dos prezos da factura eléctrica. Na actualidade Galicia conta con 46 expedientes de baterías en tramitación, que suman 492,75 MW, aos que hai que engadirlle outros 3 expedientes (17,75 MW) xa autorizados.
Foi presentada a nova edición da campaña Días Azuis do Comercio Galego, froito da colaboración entre o Executivo autonómico e a Federación Galega de Comercio, que se desenvolverá entre o 10 e o 30 de abril de 2026. Esta iniciativa ten como obxectivo incentivar e dinamizar o comercio de proximidade. Para iso, sortearanse 20.000 euros en premios entre as persoas consumidoras que realicen compras nos establecementos adheridos durante o período da campaña.
