Noticias

El Colegio Fonseca de la USC acoge la muestra Do Gaudeamos Igitur ao Venceremos Nós. As mobilizacións estudiantís do 68 en Compostela

Nota de prensa remitida por el Gabinete de Comunicación de la USC:

O Colexio de Fonseca retrocede no tempo ata finais dos anos sesenta para acubillar a mostra Do Gaudeamus Igitur ao Venceremos Nós. As mobilizacións estudantís do 68 en Compostela, produción da Fundación 10 de Marzo en colaboración coas tres universidades galegas, as consellarías de Educación e de Cultura e a obra Social de Caixa Galicia que se pode visitar ata o 27 de marzo.

Partindo da explicación do que eran en 1968 a cidade de Santiago e a USC, chégase na montaxe a unha pormenorizada explicación dos sucesos estudantís do curso 1967-1968 na universidade galega, xurdidos dun intenso activismo que cuestionaba ás autoridades académicas e, por extensión, á ditadura franquista.

Uns dos primeiros visitantes da mostra foron o presidente da Xunta de Galicia, Emilio Pérez Touriño, e o seu homólogo asturiano, Vicente Álvarez Areces, que estiveron acompañados do reitor Senén Barro, do vicerreitor de Cultura, Elias Torres, e do presidente da Fundación 10 de Marzo, Manuel Villares.

A mostra susténtase nun intenso labor de documentación que levou a cabo Ricardo Gurriarán, o seu comisario, que tirou información de numerosos arquivos ademais das duascentas horas de gravación que realizou aos protagonistas da época.

Así, o material exposto ofrece unha análise dos elementos que alicerzaron as mobilizacións estudantís posteriores, con especial énfase na dicotomía entre a cultura oficial e a cultura alternativa promovida polos estudantes ou por institucións alleas á universidade; a incipiente presenza das clandestinas forzas antifranquistas, ou os acontecementos ocorridos noutros lugares a prol da democratización das estruturas universitarias.

O conxunto expositivo pon de manifesto a solidariedade da sociedade galega e leva ao visitante ata o nacemento de Voces Ceibes, ás asembleas universitarias, ao peche da Facultade de Filosofía e Letras, á represión sobre os líderes estudantís ou a actitude do profesorado, entre outros aspectos. A exposición recolle todo tipo de documentación recuperada no proceso de investigación, como carteis, fotografías, boletíns universitarios, prensa legal e clandestina, fichas policiais ou informes gubernativos, entre outros.

Ademais, co obxecto de achegar máis ao visitante a esta época reprodúcese un cuarto de estudantes no que o visitante poderá atoparse con obxectos típicos da época, como prensa, con exemplares de Signo, Triunfo, ou Cuadernos para el Diálogo; carteis; discos; roupa ou aparellos da vida cotiá daqueles tempos.

De xeito paralelo á mostra organizaranse outros actos como sesións de cineclub, unha mesa redonda con protagonistas dos acontecementos e presentacións de libros. Xa en decembro celebrarase un concerto conmemorativo do nacemento de Voces Ceibes, que tivo a súa primeira aparición pública hai corenta anos.

Nota de prensa remitida polo Gabinete de Comunicación da Xunta de Galicia:

“O maio do 68 marca a vida de toda unha xeración que ao longo do tempo se converte en protagonista, en responsable en grande medida, e lle corresponde alumear a Transición e a construción da democracia e das autonomías en España”. Son verbas do presidente da Xunta logo da visita realizada á exposición Do Gaudeamus Igitur ao Venceremos Nós: As mobilizacións estudantís do 68 en Compostela, organizada pola Fundación 10 de marzo e que, desde onte, pode visitarse no compostelán Pazo de Fonseca.

No decurso da visita, na que tamén participou o presidente de Asturias, Vicente Álvarez Areces, o titular da Xunta puxo en valor a unha xeración que se rebelou “contra a hipocrisía” e loitou pola “democracia e contra a ditadura” no Santiago “efervescente” da época, no que –segundo asegurou- “se viñan cociñando aires de liberdade” no seo dun movemento estudantil que antecedeu ao propio “maio francés do 68”.

Segundo indicou Pérez Touriño, a exposición promovida pola Fundación 10 de marzo, “extraordinariamente plural”, recolle e recrea “momentos decisivos da historia de Galicia”. “Creo que está feita cun extraordinario sentido da realidade, recuperando a testemuña e dando voz directa aos protagonistas”, significou.

Precisamente, entre os protagonistas daqueles movementos estudantís figuraron o presidente da Xunta, Emilio Pérez Touriño, e o presidente do Principado de Asturias, Vicente Álvarez Areces. Durante a súa intervención, a aquel movemento “que xurde na Universidade pero que enlaza con toda a sociedade galega”. Areces eloxiou o intenso traballado desenvolvido polo comisario da exposición, Ricardo Gurriarán, e aplaudiu o resultado final por ter “acertado plenamente e conectado cos nosos sentimentos”. “Síntome moi satisfeito e moi honrado de figurar por aí [dixo Areces en alusión ás fotografías nas que aparecen tanto el como Pérez Touriño] e rescatar a miña vida, que acabo de descubrila nalgunhas cousas que Gurriarán se encargou de ensinarme”.

Tanto Areces como Touriño puxeron en valor a figura de José Antonio González Casanova, profesor presente hoxe na visita á exposición, por ter amosado “desde o bando dos profesionais, dos intelectuais”, desde “a cadeira da Universidade” o seu compromiso cos estudantes da época, por poñerse do lado destes e ter loitado pola consecución “das liberdades en Galicia”.

“José Antonio González Casanova marcou a nosa vida, a miña en particular, de forma determinante”, sinalou Touriño. “Abriume a vida á política, ao dereito político e constitucional e a utilizar por riba de todo a razón, a palabra e o corazón”, engadiu.

Na súa intervención, o titular da Xunta aludiu ás características que posuía aquela xeración que portou “esas 3 grandes Cs que definen ao longo da historia” á mocidade. Era, segundo sinalou, unha mocidade “crítica, comprometida e creativa”. “Unha mocidade crítica que cuestiona o sistema, as culturas dominantes, a hipocrisía moral da España escura do franquismo; unha xuventude comprometida que da un paso activo e toma o protagonismo da participación; e unha mocidade creativa na que nacen diversas formas de creatividade cultural e expresión”, salientou.