sábado, 5 de septiembre de 2026
Nota de prensa remitida por el Gabinete de Comunicación de la Consellería de Traballo de la Xunta de Galicia:
A Consellería de Traballo dedicará un orzamento de 50 millóns de euros á promoción do emprendemento e ao fomento da economía social en Galicia ao longo de 2008. Este presuposto supón un incremento dun 18,7% respecto da partida orzamentaria dedicada en 2007.
O conselleiro de Traballo, Ricardo Varela, informou desta inxección presupostaria na inauguración do congreso Estatuto do Traballo Autónomo: traballo autónomo e relacións laborais, organizado pola Consellería de Traballo, coa colaboración do Ministerio de Traballo e Asuntos Sociais e a Unión de Profesionais de Traballadores Autónomos.
Varela destacou que, do total do orzamento, 30 millóns de euros destinaranse á mellora do programa de promoción de emprego autónomo. Deste xeito, duplicaranse as contías das axudas, que poderán chegar ata os 25.000 euros, apuntou.
Salientou que en 2007 a previsión é que 6.000 autónomas e autónomos galegos creen o seu posto laboral co apoio da Consellería de Traballo, ao abeiro do programa de promoción do emprego autónomo. Engadiu que este plan está dotado cun orzamento de 24 millóns de euros.
O conselleiro de Traballo sinalou que dende o inicio da lexislatura, a Administración autonómica transmitiu á sociedade galega o seu compromiso coa cultura do emprendemento e da innovación. Aclarou que o Goberno galego apostou pola potenciación dos aspectos máis dinamizadores da sociedade galega coma fonte de riqueza, sobre a que se debe construír o futuro. Ese dinamismo e apoio contribuíu a crear 8.378 novas empresas no ano 2006, puntualizou Varela.
O representante da Xunta destacou que os traballadores autónomos son un colectivo en crecemento, no que se inclúe un importante sector da poboación. Na maioría dos casos emprenden, arriscan e innovan para dar resposta ás melloras e ás necesidades da sociedade, e melloran o tecido económico e social, manifestou.
Ricardo Varela destacou que a lei do Estatuto do Traballo Autónomo supón un fito histórico no recoñecemento económico e social do traballo autónomo. Avanzou que en 2008 a Consellería de Traballo creará o rexistro especial de asociacións profesionais de traballadores autónomos de Galicia.
Asemade, Traballo publicará o decreto que regule a creación, composición e funcións do Consello Galego do Traballo Autónomo, indicou. O conselleiro afirmou que o obxectivo é que os autónomos de Galicia poidan facer valer os dereitos colectivos que se lles recoñece na lei.
Tamén aclarou que este texto legal tentará reducir a sinistralidade laboral, a través do financiamento de programas de información e formación en prevención de riscos laborais dirixidos a este colectivo.
Ricardo Varela aproveitou para pedir aos traballadores autónomos que axuden a transmitir o apoio da Xunta de Galicia a todas aquelas persoas con inquedanzas e con ilusións por crear unha actividade empresarial, para que poidan facer realidade as súas ideas e proxectos empresariais.
O conselleiro de Traballo indicou que en Galicia, a 30 de setembro, o número de traballadores afiliados á Seguridade Social nos distintos réximes ascendía a máis de 250.000 persoas (251.085). Puntualizou que este número de afiliados distribúese entre o Réxime Especial dos Traballadores por Conta Propia ou Autónomos, o Réxime Especial Agrario e o Réxime Especial do Mar. Estes traballadores representan o 23,12% do total de afiliados á Seguridade Social en Galicia, mentres que no conxunto do Estado representan un 17,64%.
Varela mostrouse convencido de que, para o desenvolvemento profesional do colectivo das traballadoras e dos traballadores autónomos, que arriscan os seus propios recursos aportando o seu traballo persoal, este novo estatuto constitúe un marco legal que lles dará seguridade xurídica e protección na súa actividade económica e profesional. Na súa opinión, o traballo por conta propia será máis atractivo, impulsando a figura do traballador autónomo coma xerador de riqueza e creador de emprego.
A exposición 'As estacións do ano na arte galega dos séculos XX e XXI' pecha as súas portas no Museo Centro Gaiás o domingo 6 de setembro con máis de 36.000 visitas desde a súa inauguración. Concibido e comisariado pola artista e investigadora Mónica Alonso, o proxecto destaca polo seu deseño innovador, que constrúe un percorrido sensorial para mergullarse na arte contemporánea. Máis de 80 obras de 63 artistas dan forma a un itinerario que transita polas paisaxes, símbolos e lembranzas asociadas ao paso do tempo e os cambios entre a primavera, o verán, o outono e o inverno en Galicia.
Galicia continúa a manter o liderado na taxa de escolarización 0-3 por cuarto curso consecutivo, cun 64 %. Os datos do Ministerio de Educación, Formación Profesional e Deportes referentes ao período lectivo 2026-2026 consolidan este primeiro posto, con 14 puntos por riba da media nacional. Ademais, Galicia é a única comunidade autónoma que está por encima da barreira do 60 % en niveis de escolarización no primeiro ciclo de Educación Infantil e supera en case 20 puntos o obxectivo da Unión Europea para o ano 2030, que é do 45 %. Estas cifras colocan a Galicia como referente no apoio ás familias e á infancia e son posibles grazas a medidas como a gratuidade das escolas infantís.
