domingo, 8 de noviembre de 2026
Nota de prensa remitida por el Gabinete de Comunicación de la Consellería de Innovación e Industria de la Xunta de Galicia:
A Consellaría de Innovación e Industria vén de poñer en marcha o portal web do Observatorio Galego da Sociedade da Información (OGSI), co obxectivo de informar sobre o desenvolvemento das novas tecnoloxías da información e as comunicacións (TIC) en Galiza. No sitio www.ogsi.sociedadedainformacion.eu, os internautas poden consultar enquisas, diagnósticos, estudos sectoriais e monografías, elaborados polo propio Observatorio, a iniciativa da Consellaría de Innovación e Industria.
A creación do Observatorio, que efectivizou a Dirección Xeral de Promoción Industrial e Sociedade da Información da Consellaría, é unha das actuacións contempladas no Plano Estratéxico Galego da Sociedade da Información (PEGSI), o documento que guía a política de novas tecnoloxías do Goberno galego.
O OGSI aspira a converterse na fonte de referencia para o estudo e do grao de penetración das novas tecnoloxías en Galiza e as tendencias do seu desenvolvemento. Tamén busca facilitar a avaliación da eficacia e do impacto das políticas públicas nesta materia.
Para logralo, a nova web conta cunha sección de documentación que permite acceder, dun xeito sinxelo, a unha selección actualizada dos estudos e informes estatísticos de referencia de ámbito galego, estatal, europeo e internacional.
Ademais, a web do OGSI ofrece as últimas noticias e convocatorias sobre as novas tecnoloxías en Galiza. Tamén dispón dun boletín semanal coas novidades do OGSI e un clip de titulares web. O portal, que segue a desenvolverse, foi realizado na súa totalidade en código aberto, utilizando a ferramenta de xestión de contidos (CMS) Typo3 e conta con avanzados criterios de accesibilidade e licenzas Creative Commons.
Durante estes primeiros meses o sitio web irá completando os seus contidos, asumindo algunhas das funcionalidades e contidos relevantes do sitio http://www.observatoriotic.org/, que continuará a funcionar, durante un breve período de tranferencia, como repositorio histórico das métricas da sociedade da información realizadas en Galicia até 2005.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
