sábado, 13 de diciembre de 2025
Nota de prensa remitida por el Gabinete de Comunicación de la Consellería de Innovación e Industria de la Xunta de Galicia:
A Consellaría de Innovación e Industria promociona Galiza como destino turístico e o Camiño de Santiago no Xapón, a través dunha viaxe institucional que se desenvolve entre os días 7 e 17 de setembro próximos. A delegación galega está presidida polo propio conselleiro de Innovación e Industria, Fernando Blanco, que viaxa ao país nipón acompañado dos directores xerais de Industria, Enerxía e Minas, Anxo Calvo, e Turismo, Rubén Lois, así como do director xerente da S. A. de Xestión do Xacobeo, Ignacio R. Eguíbar.
O principal obxectivo da viaxe é explorar e potenciar o mercado turístico emisor xaponés cara a Galiza, que polo de agora ten un carácter emerxente, sendo o seu principal atractivo a ruta e o fenómeno xacobeos. O programa da viaxe inclúe visitas ás cidades de Toquio, Kyoto e Wakayama City. Na capital nipona está prevista a asistencia á Feira de Turismo Jata, a máis importante de Xapón, onde se manterán encontros con touroperadores e se visitará o espazo promocional de Galiza e do Camiño de Santiago.
Ademais, o día 10 inaugurarase nunha céntrica galería de Toquio a exposición Samos, espírito do Camiño, do fotógrafo galego Luis Ocaña, con imaxes artísticas de alta calidade do cenobio beneditino situado ao pé do Camiño Francés. Na apertura desta mostra estarán presentes touroperadores, prensa especializada e persoeiros da cultura e das artes da cidade.
Tamén en Toquio terá lugar, ao día seguinte e no céntrico restaurante Ogawaratei, unha cea galega cun menú elaborado polos restauradores Toñi Vicente, Marcelo Tejedor, Roberto Crespo e Carlos García (profesor do Centro Superior de Hostelería de Galicia) desprazados especialmente para a ocasión, á que está prevista a asistencia de preto dun cento de convidados. Trátase de amosar sobre o terreo as posibilidades da cociña galega de máis alto nivel, sobre todo a través de presentacións a base de produtos do mar peixe e marisco, que gozan de grande estima en Xapón.
Con motivo desta viaxe, a S.A. de Xestión do Xacobeo, que depende da Consellaría de Innovación e Industria, editou dúas publicacións bilingües (en galego e xaponés) pensadas sobre todo para o público e os profesionais turísticos xaponeses, e que resumen por un lado os atractivos turísticos de Galiza e por outro a riqueza turística, cultural, natural e histórica do Camiño de Santiago.
Outro dos obxectivos é reforzar os lazos de amizade entre Galiza e a Prefectura de Wakayama, no sur do país, arredor dos dous camiños de peregrinación de Santiago e de Kumano que atravesan estes dous territorios e que están declarados Patrimonio da Humanidade pola UNESCO. Nesta viaxe o conselleiro de Innovación e Industria e o gobernador de Wakayama asinarán un acordo de cooperación cara á promoción conxunta das dúas vías, especialmente pensado cara o 2010, ano de celebración do vindeiro Xacobeo.
O conselleiro de Innovación e Industria aproveitará a súa estadía no Xapón para coñecer instalacións punteiras dedicadas á investigación, desenvolvemento e innovación en enerxías alternativas, cunha visita a Tepco (Tokyo Electric Power), unha das empresas máis importantes do sector a nivel internacional. O director xeral de Industria, Enerxía e Minas, Anxo Calvo, tamén manterá diversos encontros de traballo durante a viaxe ao país nipón.
Os Concertos do Xacobeo da Xunta de Galicia achegarán a mellor música internacional do momento a Santiago de Compostela cunha nova edición de O Gozo Festival. Maroon 5, Martin Garrix, Danny Ocean, Rita Ora e Miriam Rodríguez son as primeiras confirmacións do festival, que presentarán os seus directos no Monte do Gozo compostelán o sábado 11 de xullo de 2026. O Gozo Fest conta co apoio da Xunta de Galicia a través da Axencia Turismo de Galicia, no marco dos Concertos do Xacobeo. En 2026, O Gozo Festival celebrará a súa cuarta edición cun line-up de luxo. O proxecto O Gozo Festival, que naceu en 2023 co apoio da Xunta de Galicia a través da Axencia Turismo de Galicia, no marco de Concertos do Xacobeo, consolidouse na súa terceira edición, celebrada en 2025, cun éxito rotundo de crítica e público.
O presidente da Xunta, Alfonso Rueda, defendeu esta mañá, na súa condición de presidente da delegación española do Comité Europeo das Rexións (CdR), unha maior cogobernanza das rexións na planificación e xestión dos fondos europeos e máis recursos para o sector primario. Así o destacou logo dunha reunión organizada polo Executivo galego entre os representantes españois tanto das comunidades autónomas como das entidades locais do CdR con eurodeputados españois e o embaixador representante permanente de España ante a Unión Europea, Marcos Alonso, 'para poñer en común as intencións e o noso plantexamento' de cara á negociación do novo Marco Financieiro Plurianual 2028-2034.
