lunes, 28 de septiembre de 2026
Nese senso, o Rexistro galego, ademais de ser un inventario administrativo, actuará como un instrumento de coñecemento do litoral que ofrecerá información pública, territorializada e actualizada de grande utilidade para a toma de decisións. Así, tal e como explicou o presidente, servirá para coñecer a distribución territorial das actividades, elaborar estatísticas e coordinar as políticas autonómicas sobre o litoral. De feito, cada título incluirá información sobre a provincia, o concello e as súas coordenadas, ademais da superficie ocupada, o prazo, o canon e, cando proceda, a causa e a data de extinción.
O principal obxectivo é garantir unha maior transparencia a todas as persoas, sectores e administracións con implicación nos usos e actividades que se desenvolven na costa. Nesa liña, Rueda explicou que se inscribirán os títulos e as súas modificacións, así como os seus pregos de condicións. Ademais, a medida que se incorporen as autorizacións e concesións, os seus datos 'serán actualizados de oficio continuamente' e, ademais de permitir a súa consulta, poderanse emitir certificacións sobre o seu contido.
A interoperabilidade do Rexistro converterao nunha ferramenta de coordinación na medida en que permitirá a circulación de datos entre diferentes administracións, constituíndo así unha infraestrutura de información compartida e unha fonte común para a xestión do litoral.
'O Rexistro permitirá facer unha radiografía bastante exacta das actividades autorizadas ao longo do territorio costeiro galego', asegurou o presidente, que salientou que a previsión da Xunta e avanzar na tramitación necesaria co obxectivo de poñer en marcha o Rexistro 'antes de que remate o ano'.
Modelo de xestión máis sinxelo, homoxéneo e accesible
O Rexistro reforzará o proceso de dixitalización, simplificación e axilización dos procedementos de obtención de títulos habilitantes no litoral. De feito, dá continuidade ao traballo que vén desenvolvendo a Xunta desde que, tal e como indicou Rueda, 'asumiu o traspaso de funcións e servizos en materia de litoral en xullo do pasado ano', co fin de consolidar un modelo de xestión máis sinxelo, homoxéneo e accesible.
Nesa liña, cómpre salientar, por exemplo, a habilitación dunha solicitude electrónica única para as autorizacións e concesións fronte á dispersión anterior de formularios e procedementos, ou a unificación dos criterios técnicos, dos prazos, das taxas e das condicións aplicables nas tres provincias costeiras galegas.
Tamén se reforzou o acompañamento á cidadanía, aos concellos e ao tecido produtivo mediante a creación do portal Galicia litoral, dunha canle específica de información no 012, así como a publicación de guías con criterios uniformes e a organización de xornadas formativas, especialmente para os servizos de tempada.
Así, Alfonso Rueda destacou que en menos de 15 meses, 'Galicia tramitou xa 2.749 actuacións en materia de litoral'. En concreto, na zona de servidume de protección tramitáronse 1.247 actuacións, entre autorizacións e declaracións responsables. En canto ao dominio público marítimo-terrestre, tramitáronse 875 títulos habilitantes, que serán incorporados progresivamente ao Rexistro de autorizacións e concesións no DPMT.
Este volume de actividade cobra especial relevancia tendo en conta as condicións nas que a Xunta tivo que asumir a nova competencia, xa que documentación transferida polo Goberno central non permitiu dispoñer dunha copia plenamente operativa e actualizada do Rexistro de usos do dominio público marítimo-terrestre para consultar de forma integral a información relativa a Galicia. Ademais, o acceso público ao rexistro estatal permanece temporalmente inactivo por traballos técnicos e o propio Ministerio recoñece que os datos nos que se basea poden conter erros ou omisións. De aí a importancia de contar cun rexistro galego que ofreza unha base de datos propia, fiable e accesible.
A esta dificultade engádese que a documentación estatal non se recibiu de maneira unitaria, senón en sucesivos lotes, e presentaba deficiencias formais e estruturais. Máis polo miúdo, remitíronse arquivos de difícil acceso, duplicados ou con problemas de adecuación á normativa técnica de interoperabilidade. Unhas carencias que dificultaron a consulta da información e a continuidade administrativa dos expedientes, polo que a Xunta tivo que realizar un importante traballo previo de análise, depuración e ordenación para garantir unha tramitación homoxénea e con seguridade xurídica.
A Xunta iniciou hoxe nas residencias de maiores a campaña de vacinación fronte á gripe, que incorpora a vacina reforzada desde os 65 anos e busca chegar a 926.000 persoas de máis de 60 anos. En Galicia hai 926.000 persoas de 60 ou máis anos como poboación diana para a vacinación fronte á gripe, e ao redor de 549.000 maiores de 70 anos, que é a poboación diana para a que está indicada a inmunización fronte á covid. A campaña prolongarase ata o 31 de decembro, desenvolvéndose de xeito progresivo nos distintos colectivos e grupos de idade. Así, logo do arranque de hoxe nas residencias de maiores e centros de discapacidade, o vindeiro día 13 de outubro incorporarase a vacinación infantil nos centros de saúde e nos 75 colexios.
O informe de balance do programa de axudas para a Atracción de Empresas a Galicia, unha liña xestionada pola Consellería de Economía e Industria a través do Igape que se consolida como un piar estable dentro da estratexia económica do Goberno galego, reflicte que entre os anos 2024 e 2026, este programa permitiu a concesión de 74,08 millóns de euros en subvencións públicas, unha contía que impulsou a posta en marcha de 96 proxectos empresariais e que xerará un impacto económico total de 256,75 millóns de euros en mobilización de investimento privado.
