viernes, 9 de octubre de 2026
O director de Turismo de Galicia, Xosé Merelles, participou hoxe na presentación do décimo aniversario do festival Flores Rock, que se celebrará os días 4, 5 e 6 de setembro cunha ampla programación musical e cultural no Barrio das Flores da Coruña.
A iniciativa, nacida no propio barrio e fortemente vinculada a súa xente e ao tecido social, mantén dez anos despois a esencia coa que comezou, cunha combinación de música, cultura e participación veciñal. O festival contará con dous escenarios e unha programación que reúne artistas e bandas de diferentes estilos, ademais de actividades para públicos de todas as idades e familias.
Neste sentido, Xosé Merelles destacou que o Flores Rock exemplifica como as iniciativas arraigadas no territorio poden contribuír a súa dinamización, á xeración de actividade económica e á proxección exterior do destino.
Tamén subliñou que o festival constitúe unha experiencia que vai máis alá dos concertos, ao integrar música, gastronomía e cultura nunha iniciativa que reforza unha oferta máis diversa e descentralizada, ao tempo que se distribúe ao longo do ano.
Un festival nacido no barrio enmarcado nos Concertos do Xacobeo
O Flores Rock naceu en 2016 como iniciativa local e, ao longo desta década, foi consolidándose no calendario cultural da Coruña sen perder a súa identidade. Na actualidade, segue sendo un festival local, pero cunha programación capaz de atraer a público de fóra.
O director de Turismo de Galicia enmarcou o apoio de Concertos do Xacobeo ao Flores Rock na aposta por unha programación musical que combina grandes experiencias con iniciativas de menor formato e forte identidade territorial.
Ao longo de 2025, máis de 1,5 millóns de persoas gozaron da programación de Concertos do Xacobeo, que contribúe a consolidar Galicia como un dos grandes destinos para a música en directo a nivel galego, nacional e internacional.
Neste contexto, iniciativas como o Flores Rock contribúen a poñer en valor o territorio e os seus barrios. O seu décimo aniversario reafirma así a capacidade dunha iniciativa nacida no ámbito local para consolidarse no calendario cultural da cidade.
Foi presentada a novena edición de Intersección, Festival Internacional de Cine da Coruña, celebrada nos Cantones Cines. O festival desenvolverase do 13 ao 17 de outubro cunha programación que combina proxeccións, exposicións, formación e encontros profesionais arredor das novas linguaxes cinematográficas. Así, as seccións competitivas Galicia, Internacional e Fulgor achegarán ao público obras afastadas dos circuítos comerciais habituais e novas voces da creación audiovisual contemporánea. En concreto, a sección Internacional reúne 27 filmes procedentes de 22 países, entre os que figuran catro estreas mundiais, 17 en España e cinco en Galicia. As propostas exploran cuestións como a tecnoloxía, a memoria, o territorio e a identidade desde linguaxes e xeografías diversas.
A Real Academia Galega de Ciencias (RAGC) celebrou en Santiago, no Salón Nobre do Colexio de Fonseca, o acto do Día da Ciencia en Galicia, no que se homenaxeou á oceanógrafa Aida Fernández Ríos (Vigo, 1947 - Moaña, 2015) como Científica Galega 2026. Ademais, entregáronse as Medallas de Investigación a cinco científicas e científicos da nosa comunidade. O presidente da Academia destacou que 'Aida Fernández Ríos foi unha investigadora capaz de identificar problemas relevantes e de situalos nun contexto internacional, converténdose nunha científica respectada moito máis alá de Galicia.
