martes, 14 de julio de 2026
Desenvolverase ata o mes de outubro, pasando por Arzúa, Betanzos, Boiro, Cedeira, San Sadurniño e Zas, na provincia da Coruña; A Fonsagrada, Foz, Meira, Monterroso, A Pobra do Brollón, Sarria, Taboada e Vilalba, na de Lugo; Allariz, A Arnoia, Cartelle, Celanova, Cea, O Pereiro de Aguiar, Ribadavia e A Veiga, na de Ourense; e A Estrada, Campo Lameiro, Mondariz e Oia, na de Pontevedra. O circuíto busca chegar a concellos localizados fóra das contornas das grandes cidades e que non contan cunha oferta de salas comerciais estables.
Imaxe real e animación
O programa, dividido en dúas sesións, inclúe os filmes finalistas nas categorías de Mellor Curtametraxe de Animación e Mellor Curtametraxe de Imaxe Real da última edición dos devanditos galardóns, con varios títulos que contaron con subvención da Consellería de Cultura, Lingua e Xuventude para o seu desenvolvemento.
Así, no bloque de ficción poderán verse Abellón, drama de Fon Cortizo no que Alex, un home confuso sobre a súa identidade, traballa creando audiodescricións para persoas con discapacidade audiovisual e aprende a percibir o mundo de xeito diferente cando coñece a Lucía, unha muller cega; Algo novo que contar, de Paula Pereira, no que unha moza se enfronta á presión social respecto á súa virxinidade; Curmán, de Alejandro Jato, unha historia centrada na viaxe á aldea dos avós para celebrar a primeira comuñón, onde o protagonista experimenta un proceso de madurez e perda da inocencia; e Adeus, Berta, con dirección de Fernando Tato e guión de Ángela Andrada, que conta o regreso a casa de Alicia para o velorio da súa nai e o reencontro coa súa irmá, ingresada nun centro de rehabilitación.
Os títulos de animación son Lucus, de David Fidalgo Omil, unha curta de fantasía e aventuras na que unha moza loita para evitar a destrución da súa cidade mediante unha trama que mestura acción cunha comedia hilarante e irónica; Nuno, de Nuno Taborda, 2D debuxada a man que narra a viaxe dunha persoa nova para comprender a súa conexión cun tío falecido ao que nunca chegou a coñecer; O mesmo, con dirección de Virginia Curiá e guión de Inés Pintor, peza que aborda a violencia dixital de xénero, e O corpo de Cristo, con dirección e adaptación de guión de Bea Lema, no que a personaxe de Adela busca curar o seu trastorno mental recorrendo á ciencia, á fe e á tradición.
O Ciclo Mestre Mateo Galicia Calidade está financiado en virtude do acordo acadado para esta actividade entre a Axencia Galega das Industrias Culturais e o Instituto de Cinematografía y das Artes Audiovisuais do Ministerio de Cultura.
As oito curtametraxes finalistas na última edición dos Premios Mestre Mateo volven percorrer Galicia como parte do Ciclo de Mestre Mateo Galicia Calidade en virtude da colaboración entre a Xunta de Galicia e a Academia Galega do Audiovisual para contribuír á difusión da produción galega neste formato. Deste xeito, as oito pezas de ficción e animación que chegaron á última fase dos galardóns visitarán este ano 26 concellos galegos combinadas en dúas sesións de catro curtas segundo se trate de obras en imaxe real ou de animación. A iniciativa, que pasou xa polos municipios de Cea e Vilalba, continuará este mes coas vindeiras proxeccións en Meira (15 de xullo) e Ribadavia (28 de xullo) como parte da campaña de verán da 'Para gustos, cultura'.
O presidente da Xunta, Alfonso Rueda, avanzou que Galicia será a Capital iberoamericana da gastronomía saudable entre este ano e 2027, o que servirá para potenciar a cociña galega como un dos piares da actividade turística, da proxección exterior e da identidade propia da comunidade autónoma. O titular do executivo autonómico asinou un convenio de colaboración neste sentido co presidente da Academia Iberoamericana de Gastronomía, Rafael Ansón. Durante o tempo que dure a capitalidade, organizaranse diversos tipos de actividades como campañas de difusión, elaboraranse materiais como recetarios ou revistas, así como tamén se celebrarán concursos e congresos.
