martes, 21 de julio de 2026
Galicia rexistra en xuño con 1.123.034 cotizantes o máximo de afiliacións á Seguridade Social e con 105.768 persoas paradas o nivel de desemprego máis baixo de toda a serie histórica. Así o destacou hoxe a directora xeral de Formación e Cualificación para o Emprego, Zeltia Lado, durante a valoración dos últimos datos de paro e de afiliacións.
No caso das afiliacións, soben tanto na comparativa anual como na mensual. Hai preto de 20.400 afiliacións máis que hai un ano e case 11.200 cotizantes máis que hai un mes, sendo na comparativa mensual o ritmo de subida maior ao estatal.
En relación co paro, cae tanto na comparativa anual , cunha redución do -1,39 % como na mensual, neste caso un -3,28 %. No caso da mensual, hai preto de 3.600 persoas desempregadas menos en relación con maio de 2026, o que sitúa a Galicia como a comunidade de España na que máis baixa o paro no último mes en termos relativos cun ritmo de caída máis de 2 puntos superior ao nacional.
Na comparativa anual, o paro tamén baixa en todos os sectores de actividade, liderando a baixada a construción (-8,56 %), seguida do sector primario (-5,07 %), da industria (-3,03 %) e, por último, dos servizos (-1,96 %).
No que respecta aos colectivos prioritarios, tanto no caso das mulleres como no dos parados de longa duración rexístrase a cifra máis baixa de desemprego de toda a serie (maio 2005). No caso das mulleres desempregadas a redución anual é de case 1.000 persoas (-1,58 %) e no dos parados de longa duración a baixada é de preto de 800 (-1,42 %).
Segundo salientou Zeltia Lado, estes datos analizados desde unha perspectiva de medio e longo prazo, reflicten unha evolución favorable do mercado laboral. Tamén poñen de manifesto, engadiu, a contribución das políticas activas de emprego co desenvolvemento de medidas para potenciar o talento interno, o emprendemento, o labor dos autónomos e tamén para atraer o talento do exterior cun modelo propio.
O Atlantic Fest celebra este verán a súa décima edición consolidado como unha das citas musicais imprescindibles. Do 17 ao 19 de xullo, a praia da Concha de Vilagarcía de Arousa volverá acoller un festival que combina música, paisaxe, gastronomía e identidade propia, converténdose nun dos grandes atractivos culturais e turísticos das Rías Baixas durante a tempada estival. A décima edición do Atlantic Fest presenta unha programación que combina grandes nomes internacionais, referentes do panorama estatal e unha destacada presenza de artistas galegos. Entre as actuacións internacionais sobresae a presenza de Franz Ferdinand, nunha das súas poucas actuacións deste verán e única en Galicia.
O 60,66% dos 877 ciclos de Formación Profesional de réxime ordinario para o próximo curso en Galicia complétanse na primeira adxudicación de prazas pechada pola Consellería de Educación, Ciencia, Universidades e FP, e que dá dereito a matrícula. Segundo os datos recabados, un total de 57.118 persoas presentaron solicitude para cursar algunha modalidade de Formación Profesional, o que representa un incremento de preto do 2% (1.069 solicitudes máis) con respecto ao curso 2025-26, o que confirma, un ano máis, o interese que espertan estas ensinanzas entre os cidadáns en Galicia. O maior número de solicitudes rexístranse nos ciclos superiores da modalidade ordinaria, con 15.893 solicitudes, 643 máis (un 4,22% de incremento) que o curso pasado.
