jueves, 1 de octubre de 2026
Con estas iniciativas, a compañía de teatro da Xunta de Galicia reforza o diálogo escénico arredor do universo shakespeariano aberto por Hamlet, a versión galega da obra mestra da literatura dramática dirixida por Tito Asorey e adaptada por Vanesa Sotelo e o propio director, que permanece en cartel no Salón Teatro desde o 19 de marzo ata o 3 de maio con funcións de mércores a domingo ás 18,00 horas. A partir de mañá, as novas actividades afondan na obra e na figura do bardo inglés desde distintos formatos e linguaxes, ampliando as vías de acceso do público á creación teatral.
Un Ricardo III que rebate a Shakespeare
Mala vida e pior morte de Ricardo III é un espectáculo unipersoal protagonizado por Evaristo Calvo, coprodución do Centro Dramático Galego con P.T. Excéntricas, no que o defunto rei de Inglaterra se dirixe directamente ao público para rebater a visión que William Shakespeare deixou trazada sobre os últimos anos da súa vida no drama A vida e a morte do rei Ricardo III.
A peza, fraguada o pasado ano no marco do programa Clásicas Desfesitas xunto á Cidade da Cultura de Galicia, propón unha lectura revisionista deste monarca da Inglaterra do século XV tentando situalo no contexto da ciencia histórica, así como poñer en valor a súa dimensión humana a través do humor. Neste exercicio teatral, personaxe e intérprete expoñen as súas contradicións nun xogo deliberadamente esquizoide que ofrece unha nova aproximación á materia shakespeariana e que contribúe a expandir e complementar a experiencia de visionado de Hamlet.
Apoio aos formatos de Improvisación teatral
O programa ImproVersións, integrado nas actividades paralelas do Centro Dramático Galego no seu apoio aos formatos actuais de improvisación teatral, desenvolverase nesta ocasión a través de cinco funcións baixo o título A propósito de William, a cargo da compañía Improversados, previstas para os domingos 29 de marzo e 5, 12, 19 e 26 de abril ás 20,30 horas no Salón Teatro.
Interpretada por Víctor Castro, Antía Vidal e Diego Salgado, a proposta parte dunha premisa singular: sobrevivir a unha matanza é duro, pero moito máis se despois toca contala. Así, os cómicos de Hamlet e o pobre Horacio abandonan Elsinor co trauma no corpo e coa necesidade de atopar un novo traballo facendo o que mellor saben: encarnar historias tal e como as tería escrito o seu finado dramaturgo, un tal William, que quedou na corte co resto dos cadáveres. A partir de aí, o espectáculo constrúe historias improvisadas no estilo de Shakespeare e coa característica esencia musical de Improversados.
As entradas para os pases de Mala vida e pior morte de Ricardo III e A propósito de William son independentes das de Hamlet e xa están dispoñibles a través da plataforma en liña Ataquilla. Tamén poden adquirirse no portelo do Salón Teatro nos días de función.
Acción especial polo Día Mundial do Teatro
Tamén esta semana, coincidindo coa celebración do Día Mundial do Teatro o venres 27 de marzo, o Centro Dramático Galego desenvolverá na véspera unha actividade especial de mediación no Salón Teatro coa participación de arredor de 73 estudantes de ensino medio. Será alumnado procedente dos instituto Val do Tea, de Ponteareas, e do instituto A Xunqueira, de Pontevedra, centro no que se imparte o Bacharelato de Artes Escénicas, ademais dun grupo de teatro escolar de Mos.
A xornada celebrarase o xoves 26 en horario de mañá e incluirá unha visita ás instalacións do edificio, así como un coloquio con Tito Asorey e con integrantes do elenco de Hamlet. Como remate, un dos grupos participantes ofrecerá unha breve mostra do traballo que está a desenvolver nas aulas arredor desta peza.
A sexta edición de 6coreógrafas acollerá dúas estreas: Trés bien, de Marta Alonso Tejada, un dúo de danza contemporánea de rúa interpretado por María de Vicente e Inés Santos que explora o esforzo de sosterse e permanecer xuntas, e BenQuererme, un solo de de Fran Sieira, que combina danza tradicional e contemporánea para reflexionar sobre o autocoidado emocional e o amor propio. A programación completarase con Suit(e), de Furia Sotelo, un diálogo entre a danza de Nuria Sotelo e o violonchelo de Millán Abeledo, e Bipedestrucción, da compañía navarro-galega Disiden.cia, unha peza de rúa para todos os públicos que aborda desde o humor a identidade, a diversidade e a importancia da comunidade.
O presidente da Xunta, Alfonso Rueda, informou de que o Goberno autonómico vén de autorizar na reunión desta mañá o envío ao Consello Consultivo de Galicia do decreto polo que se crea o Rexistro de autorizacións e concesións no dominio público marítimo-terrestre (DPMT). 'Isto vai situar Galicia á vangarda en transparencia e xestión do litoral', indicou. 'Imos habilitar un sistema para que a cidadanía poida coñecer en todo momento os usos e autorizacións vixentes na costa galega', salientou o presidente sobre un Rexistro, concibido para incorporar progresivamente as autorizacións e concesións no DPMT e que permitirá sistematizar e ampliar a información dispoñible sobre as actividades autorizadas, o que resulta fundamental para avanzar na planificación, protección e xestión integrada da costa galega así como reforzar a seguridade xurídica das actividades e proxectos.
