jueves, 1 de octubre de 2026
A compañía Elefante Elegante presentou hoxe no Auditorio Municipal de Rianxo o seu novo espectáculo, Coralinda, unha coprodución galego-portuguesa dirixida ao público infantil e familiar, que aborda temas como a inmigración e o medio ambiente a través dunha posta en escena chea de humor e ao estilo dos debuxos animados. O espectáculo, que contou co apoio da Xunta de Galicia para a súa creación, terá a súa estrea galega mañá nese mesmo escenario rianxeiro ás 19,00 h., despois de que o público portugués a vise o pasado sábado na localidade de Tondela, sede do colectivo luso Trigo Limpo Teatro Acert.
O director da Axencia Galega das Industrias Culturais, Jacobo Sutil, participou na presentación desta nova montaxe, nun acto no que tamén interviñeron responsables municipais dos concellos de Rianxo, Culleredo e Carral, colaboradores co proxecto, ademais de membros do equipo artístico da compañía que lideran María Torres e Gonçalo Guerreiro.
Facilitar a actividade escénica continuada
O representante da Consellería de Cultura, Lingua e Xuventude puxo en valor a traxectoria de xa máis de 25 anos desta formación, caracterizada polo seu estilo propio dun teatro físico de gran plasticidade, así como o seu papel no desenvolvemento do teatro galego contemporáneo, ao tempo que salientou o apoio institucional á súa actividade. Neste sentido, Elefante Elegante conta cunha subvención plurianual de 100.000 euros concedida polo Goberno galego a través das axudas á creación escénica para o período 2024-2026.
Este tipo de apoio, explicou Sutil, busca facilitar a planificación a medio prazo das compañías consolidadas do sector, contribuíndo tanto a manter as súas estruturas e a produción de novos espectáculos como a súa exhibición e circulación polos escenarios galegos. Así, por medio desta canle, Elefante Elegante xa montou o pasado ano o seu anterior espectáculo, Alta costura, e mantivo a distribución doutras propostas do seu repertorio, como son Kyoki, Alma de tigre e Cubo.
Teatro xestual e de obxectos para a partir dos tres anos
Coralinda é unha comedia xestual dirixida a público familiar e infantil (a partir dos tres anos). A través dunha linguaxe xestual fundamentada na manipulación de obxectos e na interacción constante co dispositivo escénico, a obra constrúe un universo cómico e poético que transita do realismo á hipérbole da vida cotiá.
Trátase dunha proposta escénica ao estilo dos debuxos animados que aborda a temática da inmigración e do medio ambiente desde o humor, a poesía visual e a emoción. A obra convida a reflexionar, de maneira accesible e sensible, sobre as experiencias das persoas que viaxan lonxe da súa terra na procura de mellores condicións de vida.
Pablo Sánchez, María Torres e Sofía Espiñeira son os intérpretes de Coralinda. María Torres e Gonçalo Guerreiro asinan a dramaturxia, Gonçalo Guerreiro tamén a dirección de escena e a escenografía, Diego Valeiras o vestiario, Carolina Díguele a produción de arte, Manuel Fonte Loureiro a composición musical e Paulo Nieto a iluminación.
A sexta edición de 6coreógrafas acollerá dúas estreas: Trés bien, de Marta Alonso Tejada, un dúo de danza contemporánea de rúa interpretado por María de Vicente e Inés Santos que explora o esforzo de sosterse e permanecer xuntas, e BenQuererme, un solo de de Fran Sieira, que combina danza tradicional e contemporánea para reflexionar sobre o autocoidado emocional e o amor propio. A programación completarase con Suit(e), de Furia Sotelo, un diálogo entre a danza de Nuria Sotelo e o violonchelo de Millán Abeledo, e Bipedestrucción, da compañía navarro-galega Disiden.cia, unha peza de rúa para todos os públicos que aborda desde o humor a identidade, a diversidade e a importancia da comunidade.
O presidente da Xunta, Alfonso Rueda, informou de que o Goberno autonómico vén de autorizar na reunión desta mañá o envío ao Consello Consultivo de Galicia do decreto polo que se crea o Rexistro de autorizacións e concesións no dominio público marítimo-terrestre (DPMT). 'Isto vai situar Galicia á vangarda en transparencia e xestión do litoral', indicou. 'Imos habilitar un sistema para que a cidadanía poida coñecer en todo momento os usos e autorizacións vixentes na costa galega', salientou o presidente sobre un Rexistro, concibido para incorporar progresivamente as autorizacións e concesións no DPMT e que permitirá sistematizar e ampliar a información dispoñible sobre as actividades autorizadas, o que resulta fundamental para avanzar na planificación, protección e xestión integrada da costa galega así como reforzar a seguridade xurídica das actividades e proxectos.
