martes, 22 de septiembre de 2026
O conselleiro de Educación, Ciencia, Universidades e FP, Román Rodríguez, participou esta mañá no primeiro encontro de centros participantes no programa Radio na biblio, impulsado polo departamento educativo da Xunta de Galicia. A xornada reúne hoxe na Cidade da Cultura 650 escolares de 5º e 6º de Primaria e docentes que participan nas emisoras dos seus respectivos centros. O obxectivo é poñer en valor o traballo de alumnado e profesorado neste eido e destacar o papel da radio como ferramenta formativa.
Román Rodríguez subliñou o valor do programa Radio na biblio para favorecer as competencias lingüísticas dos estudantes e, sobre todo o traballo en grupo, o que promove unha boa convivencia entre os diferentes membros da comunidade educativa. No transcurso da xornada, presentada pola xornalista Esther Estévez, un grupo de rapaces do Colexio de Petelos (Mos) entrevistou tanto ao conselleiro como á piragüista Teresa Portela e ao divulgador Miguel Ángel Cajigal, El Barroquista.
Ademais, os alumnos asistentes teñen a oportunidade de coñecer a profesionais do sector, de maneira que poden achegarse ao funcionamento dos medios de comunicación reais. Para iso, alumnos do CEIP Plurilingüe Virxe do Carme (Sober) e do CEIP Plurilingüe Nosa Señora de Xuvencos (Boborás) entrevistan a Kike Magdalena (Radio Galega), Andrea Oca (Radio Nacional), Mario Moreno (Cadena SER), Ignacio Capeáns (Onda Cero), Patricia Iglesias (COPE) e Eva Millán (Radio Voz).
O encontro inclúe a celebración de obradoiros simultáneos de teatro radiofónico, laboratorio de radio e locución e expresión oral. Impártenos o actor Artur Trillo, os xornalistas Sergio Pascual e Susana Bastón e as actrices e escritoras Cris Collazo, Soledad Felloza e Charo Pita.
Centros participantes
Pola provincia da Coruña participan os colexios CEIP Plurilingüe A Cristina (Carballo), CEIP Emilia Pardo Bazán (A Coruña), CEIP Plurilingüe San Xoán de Filgueira (Ferrol), CEIP Plurilingüe da Rabadeira (Oleiros), CEP Xosé María Brea Segade (Rianxo), CEIP Lamas de Abade (Santiago de Compostela) e CPI Plurilingüe de Fonte-Díaz (Touro); mentres que pola de Lugo o fan os CEIP Plurilingüe Virxe do Corpiño (Begonte), CEIP de Cervo (Cervo), CPI Plurilingüe Virxe do Monte (Cospeito), CEIP Plurilingüe de Monforte de Lemos (Monforte de Lemos) e CEIP Plurilingüe Virxe do Carme (Sober).
Da provincia de Ourense asisten os CEIP Plurilingüe O Ruxidoiro (Barbadás), CEIP Plurilingüe Nosa Señora de Xuvencos (Boborás), CEIP O Couto (Ourense), CPI Plurilingüe José García García (Ourense) e CEIP Padre Crespo (Xunqueira de Ambía); mentres que pola de Pontevedra o fan os CEIP de Corvillón (Cambados), CEIP do Foxo (A Estrada), CEIP Valle-Inclán (O Grove), CEIP Plurilingüe As Covas-Meaño (Meaño), CEIP de Petelos (Mos), CPI Manuel Suárez Marquier (O Rosal) e CEIP Ramón de Valenzuela (Silleda).
Un programa consolidado
O programa Radio na Biblio, que vai polo noveno ano en funcionamento, chega este curso a 245 centros de ensino que contan cun laboratorio de radio no que traballan as competencias vencelladas á alfabetización mediática, lingüísticas ou de expresión escrita e oral, entre outros.
Con nove cursos en marcha, trátase dun programa consolidado que aproveita a posta en marcha dunha emisora de radio na biblioteca para traballar habilidades e destrezas e que permite o tratamento de contidos curriculares mediante metodoloxías activas e innovadoras que facilitan a aprendizaxe. Ademais, as actuais tecnoloxías da información e da comunicación facilitan o uso da radio como ferramenta pedagóxica de gran alcance para a difusión dos proxectos e iniciativas do centro educativo.
Esta iniciativa enmárcase no Plan LÍA 2021/2025 de bibliotecas escolares, co reforzo de programas que inciden na formación do alumnado no seu acceso aos medios de comunicación, como é o caso, con propostas que promovan o coñecemento e un uso responsable da información en múltiples formatos.
O Consello da Xunta analizou na súa reunión de hoxe un informe da Consellería do Medio Rural sobre o anteproxecto de Lei de loita contra os incendios forestais de Galicia (LLCIF), antes da súa remisión para consulta ao Consello Forestal de Galicia, cuxa reunión está prevista para mañá martes. A futura normativa prioriza reforzar a protección da poboación e a xestión integral do territorio. O presidente do Goberno autonómico, Alfonso Rueda, lembrou que actual lexislación sobre incendios forestais 'ten case 20 anos' e 'cómpre actualizarla e adaptala aos novos tipos de lumes así como aos avances que houbo tanto na loita como na prevención de incendios'.
Galicia é a rexión que máis solicitudes presentou en Europa para participar en proxectos interrexionais de I+D+i. Así o indican os datos da Vanguard Initiative, alianza europea da que a nosa Comunidade forma parte, xunto a outras rexións, para estimular o crecemento europeo da I+D+i a través da colaboración entre territorios de distintos países e a especialización intelixente. Precisamente a Xunta vén de publicar a convocatoria VInnovate Galicia, unha liña de axudas para organismos de investigación e empresas que presenten proxectos con outras rexións. Para poder candidatar á convocatoria VInnovate Galicia da Xunta, cuxo prazo de presentación de propostas está aberto desde hoxe ata o 19 de outubro, os posibles participantes teñen que presentarse antes á fase europea.
