lunes, 20 de abril de 2026
A conselleira de Política Social e Igualdade, Fabiola García, avanzou esta mañá que Galicia logrou inverter a evolución demográfica proxectada nos últimos anos grazas ao aumento da poboación. Así o sinalou durante a súa visita á Farmacia Labella situada no centro de Santiago de Compostela e que conta con produtos para o coidado dos bebés e os primeiros anos de vida dos cativos.
Fabiola García sinalou que a comunidade galega logrou superar as proxeccións que estableceran os organismos de estatística oficiais, nas que hai unha década se estimaba que no 2025 habería 2,5 millóns de habitantes, unha cifra que recalcou- melloramos en 120.000 habitantes. Ao respecto, fixo fincapé en que no último ano rexistráronse 10.700 habitantes máis.
Neste sentido, a conselleira tamén explicou que a última estatística do Instituto Nacional de Estatística (INE) apunta a unha melloría en Galicia que acadou no mes de maio un 16% máis de nacementos con respecto ao mesmo período do ano anterior. Así, García indicou que pese a baixada xeralizada da natalidade en toda España, as cifras amosan un cambio de tendencia positiva na comunidade galega.
Por iso mesmo, Fabiola García fixo fincapé en que o Executivo galego seguirá intensificando as medidas destinadas a asentar e atraer poboación garantindo sempre o apoio a todas as familias. Ao respecto, tamén sinalou que as medidas pioneira impulsadas pola Xunta para a conciliación están contribuíndo a mellorar o reto demográfico.
Algunhas destas medidas e programas postos en marcha pola Xunta e que xa están a ser imitados por outras comunidades, son fundamentais para facilitar a conciliación das familias en todos os ámbitos, especialmente nas zonas rurais. Así, implantouse a gratuidade na etapa educativa de 0 a 3 anos e que permitiu que Galicia conte coas mellores cifras de escolarización infantil do conxunto de España, unha iniciativa que se complementa coa creación das casas niño, recursos gratuítos e específicos de atención aos cativos nas zonas máis despoboadas.
Ademais, o Executivo autonómico conta con achegas económicas destinadas a apoiar as familias na crianza dos seus fillos, entre elas destacan o Bono Concilia Familia, que permite sufragar os custos dun servizo de conciliación para as etapas non lectivas, ou a Tarxeta Benvida, que permite financiar a adquisición de produtos necesarios para os primeiros meses de vida dos bebés.
Tarxeta Benvida
En concreto, esta mañá, a conselleira visitaba unha das farmacias adheridas á Tarxeta Benvida, e na que os pais e nais poden adquirir calquera produto para o coidado dos fillos. Trátase dunha medida impulsada hai case dez anos e que beneficia a máis de 115.000 familias e cun investimento da Xunta de máis de 220 millóns de euros.
Esta achega é de 1.200 euros para a crianza durante o primeiro ano de vida do cativo, pero aumenta o dobre nos casos nos que o bebé é o terceiro fillo da familia e conta tamén cun incremento do 25% para as unidades familiares que vivan en concellos de menos de 5.000 habitantes. Ademais, desde o ano pasado, as mulleres embarazadas poden solicitar esta achega a partir da semana 21 de xestación, ao igual que as familias acolledoras.
O FIV de Vilalba volverá reunir na localidade lucense unha programación destacada da escena independente e alternativa estatal, cun cartel no que figuran nomes como Carlos Ares, Alcalá Norte, La M.O.D.A. e Ángel Stanich, xunto a outras propostas moi presentes no panorama actual como Repion, Puño Dragón, Celia Becks, Futuro Alcalde, Grande Osso e Rapariga DJ. A boa resposta do público nas últimas semanas confirma, ademais, a gran acollida desta edición, coa previsión de que Vilalba volva encherse de ambiente festivalero a próxima fin de semana. A programación do FIV de Vilalba desenvolverase entre o Escenario Vibra Mahou, o Escenario #Fiver by Lactalis e a Zona DJ, consolidando un formato que combina os grandes concertos nocturnos coa actividade diúrna do sábado.
Galicia sitúase como a comunidade autónoma con menor porcentaxe de pacientes que agardan máis de 60 días por unha consulta co especialista. Así o referendan os datos publicados polo Ministerio de Sanidade sobre listas de espera no Sistema Nacional de Saúde a peche de 2025. Segundo os datos, en decembro de 2025 a comunidade galega situouse como a cuarta rexión española con mellores tempos medios de espera no ámbito das primeiras consultas. Neste eido, o Servizo Galego de Saúde rexistrou unha media de 63 días de espera, fronte aos 102 do Sistema Nacional de Saúde. Estas cifras reflicten que os galegos esperan 39 días menos para acceder a unha consulta co especialista que a media dos españois.
