lunes, 26 de octubre de 2026
O director xeral de Loita contra a Violencia de Xénero, Roberto Barba, avanzou recentemente que o texto no que está traballando a Xunta de Galicia para a primeira Lei de Violencia Dixital de España, contará con medidas específicas para a protección e atención das vítimas de violencia de xénero. Así o sinalou durante a xornada profesional sobre violencia de xénero dixital e menores que se celebrou esta semana en Ourense e na que tamén participou a directora xeral de Ordenación e Innovación Educativa, Judith Fernández.
Durante o seu relatorio, Roberto Barba lembrou que a Lei de Violencia Dixital na que traballa o Executivo autonómico, incluirá referencias específicas para a loita contra a violencia de xénero. En concreto, Barba adiantou que se contemplan recursos e medidas de gran calado para paliar o sufrimento das vítimas deste tipo de violencia.
Neste sentido, o director xeral defendeu a importancia de seguir traballando na sensibilización e prevención dos crimes contra as mulleres en todos os ámbitos sociais. Deste xeito, recalcou que a Xunta de Galicia traballa en colaboración con todos os axentes sociais para seguir impulsando medidas e iniciativas neste eido. Así, fixo mención a Guía de inicios para a detección das vítimas de violencia de xénero na empresa ou o Protocolo contra as violencias machistas e lgbtifóbicas no ocio nocturno.
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
