lunes, 26 de octubre de 2026
O presidente da Xunta, Alfonso Rueda, anunciou que o Consello da Xunta autorizou hoxe a interposición dun recurso de inconstitucionalidade contra o Real decreto lei 2/2025, do 18 de marzo, sobre a repartición de menores migrantes non acompañados, que o Goberno central impón ás comunidades autónomas, despois de recibir o pronunciamento favorable do Consello Consultivo de Galicia (CCG). O dictame deste órgano consultivo dá varias razóns e argumentos xurídicos. O principal é que hai unha invasión clara das competencias autonomías, destacou o presidente.
O Consello Consultivo de Galicia emitiu un ditame no cal indica que esta norma invade as competencias autonómicas en materia de asistencia social e protección de menores. No seu pronunciamento, este órgano sinala que o Real decreto - lei sería inconstitucional, cando menos, en seis artigos, dúas disposicións adicionais e dúas disposicións finais.
Neste sentido, o ditame do CCG destaca que, malia que o Estado invoca as competencias en materia de inmigración e estranxeiría para fundamentar a regulación do RDL, en realidade estamos ante unha materia vinculada ás competencias de asistencia social, que lle corresponde en exclusiva á comunidade autónoma. O titular do Executivo galego apuntou que o ditame cuestiona a exixencia do acordo unánime sobre o que descansa a regulación, xa que na súa falta (para o que bastaría o voto en contra, por exemplo, do representante estatal na Conferencia sectorial) a intervención pasa a ser estatal, co que se impide a participación da Comunidade no que debe ser un proceso colaborativo: Trátase dun decreto sen obxectivar e sen ter en conta ás que teñen que prestar os servizos, que son as comunidades autónomas, salientou Rueda.
O Consello Consultivo tamén cuestiona o uso do Real decreto lei para este suposto, xa que se trata dunha figura á cal se debe recorrer en casos de urxente e extraordinaria necesidade, tal como se recolle no artigo 86 da Constitución. Neste caso non estaría xustificado, ao ser unha situación que se vén producindo nos últimos oito anos. Nesta liña, o Consultivo lembra que desde 2022 se produciron varios acordos sobre esta materia na Conferencia Sectorial de Infancia e Adolescencia.
Tras a valoración favorable por maioría do Consello Consultivo de Galicia, Rueda anunciou que a Xunta vai interpoñer o recurso de inconstitucionalidade ante unha norma que considera que invade competencias autonómicas, que prexudica claramente o sistema de protección da infancia, e que deseña un modelo que obriga a Galicia a empregar os seus propios fondos para prestar un servizo que vén imposto polo Estado sen consenso previo.
Neste sentido, Rueda apuntou que a Xunta de Galicia sempre votou a favor das distintas reparticións de menores migrantes non acompañados no seo da Conferencia Sectorial de Infancia e Adolescencia, xa que todos eles se realizaron de xeito consensuado, planificado e con financiamento por parte da Administración xeral do Estado, que é o que segue demandando o Goberno galego: Galicia non se vai negar nunca a ser solidaria, pero demandamos que as cousas se fagan ben, con planificación e financiamento, salientou. Pola contra, o Real decreto - lei anula o consenso e a participación das comunidades autónomas, e opta pola vía da imposición, ao tempo que o propio Goberno central recoñeceu que non prevé achegar financiamento por estes traslados.
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
