lunes, 26 de octubre de 2026
O presidente da Xunta, Alfonso Rueda, salientou hoxe o liderado de Galicia en distintivos de calidade ambiental con 137 bandeiras azuis.
O titular do Goberno galego participou hoxe no acto de entrega das bandeiras azuis en Galicia, onde puxo en valor o recoñecemento que supón o distintivo tras un duro exame e fiscalización, enviando unha mensaxe de que hai un lugar que paga a pena visitar. Ademais, salientou o traballo que desde hai anos se realiza para garantir a protección do litoral galego, a calidade ambiental e a promoción dun turismo sostible e con identidade propia.
Así, Rueda destacou que a importancia destes distintivos vai máis aló do seu valor simbólico, representando un recoñecemento ao labor dos concellos, dos equipos de limpeza e seguridade, así como da cidadanía, que coida e se preocupa polos recursos naturais.
Na edición deste ano, Galicia volve situarse entre as Comunidades Autónomas con máis bandeiras azuis do Estado, cun total de 137 distintivos: 108 en praias, 12 en portos deportivos e 17 en centros azuis. A estes súmanse 54 sendeiros azuis recoñecidos no primeiro trimestre do ano, o que supón un total de 191 galardóns, dous máis que en 2024. Con estas cifras, Galicia mantense como a terceira Comunidade con máis bandeiras e lidera a nivel estatal o número de rutas azuis, que suman preto de 400 quilómetros.
O xefe do Executivo autonómico destacou tamén as novas incorporacións nesta edición, como a praia de Mende, en Vigo, que recibe o distintivo por primeira vez, ou o Liceo Marítimo de Bouzas, que se incorpora á lista de portos deportivos recoñecidos. Ademais, engádense dous novos centros azuis: o Museo do Mar de Sorrizo (Arteixo) e o Visor Nautilus, nas instalacións da Autoridade Portuaria de Vigo.
Rueda subliñou que este verán será especialmente significativo, xa que o 1 de xullo culminará o proceso de traspaso das funcións e servizos para a xestión do litoral á Xunta de Galicia, o que permitirá unha actuación directa, ordenada e sustentable da costa, con garantías de emprego e seguridade xurídica.
Neste sentido, o presidente sinalou a necesaria colaboración cos concellos, unha responsabilidade compartida na mellor xestión do litoral, e afirmou que as bandeiras son un símbolo desa tarefa colectiva e da Galicia Calidade que facemos entre todos.
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
