lunes, 7 de septiembre de 2026
O Centro Dramático Galego e a compañía Os Monicreques de Kukas estrean mañá mércores 28 ás 18,00 h. no Salón Teatro de Santiago de Compostela a coprodución O carteiro de Ximaraos, peza teatral para público familiar baseada na obra de Carlos Labraña gañadora en 2024 do Premio Manuel María de Literatura Dramática Infantil convocado pola Consellería de Cultura, Lingua e Xuventude, a través da Axencia Galega das Industrias Culturais.
O equipo artístico galardoado o ano pasado co Premio Xuventude Crea na modalidade de teatro é o responsable da posta en escena baixo a coordinación da compañía teatral da Xunta, con Susana Villaverde na dirección e compartindo a dramaturxia con Ezequiel Rodríguez.
Marcelino de Santiago Kukas e Isabel Rey interpretan esta historia cos seus bonecos, e son tamén responsables do deseño e e indumentaria dos monicreques xunto a Amelia Poyato, quen se encarga ademais da iluminación. A escenografía e os audiovisuais están concibidos por Maite Dubois. Xosé Lois Romero asina a composición musical e o espazo sonoro foi creado por Noemi Pardo, que colabora tamén nas voces gravadas.
Despois do pase de preestrea para escolares previsto para hoxe, a peza representarase no escenario do Salón Teatro durante tres días, do 28 ao 30 de maio, ás 18.00 horas. As localidades están á venda na plataforma en liña entradas.ataquilla.com e tamén se poderán adquirir no despacho de billetes do número 34 da rúa Nova compostelá desde as 16,30 h.
Cartas como antídoto contra o esquecemento
O carteiro de Ximaraos presenta unha historia que mestura maxistralmente realidade e fantasía para abordar dúas temáticas de gran relevancia: o impacto emocional do mal de alzhéimer nas familias e o papel da memoria ligada ao correo postal como fío condutor das relacións humanas.
A obra céntrase na relación entre Xoán e o seu avó, antigo carteiro da vila de Ximaraos, que cada vez ten peor memoria. Xoán e mais a súa nai van vivir con el para coidalo e o neno comeza a achegarse ás lembranzas do repartidor de cartas, como a colección de postais penduradas da parede que o avó non lle deixa nin tocar. Co paso do tempo, o ancián cada vez recorda menos cousas, mais do seu maxín nacen diferentes historias que Xoán escoita abraiado, sen saber moi ben se son reais ou inventadas. Ademais, o avó está sempre coa teima de que hai que facer o repartimento das cartas. Xoán pensa que é outro conto máis, ata que atopa no faiado unha saca de correo chea de cartas sen entregar e aparece na súa vida a difícil misión de facer chegar todos aqueles sobres aos seus destinos despois de tanto tempo. A través desta conexión, o espectáculo reflexiona sobre como as historias, as memorias compartidas e os pequenos rituais familiares poden enfrontarse ao esquecemento.
Con este espectáculo, o Centro Dramático Galego continúa a impulsar e a participar en proxectos compartidos con empresas e profesionais do país, desta volta a través dunha proposta de teatro de obxectos na que se implica á mocidade e cunha das compañías máis senlleiras de Galicia neste ámbito, como son Os Monicreques de Kukas.
A exposición 'As estacións do ano na arte galega dos séculos XX e XXI' pecha as súas portas no Museo Centro Gaiás o domingo 6 de setembro con máis de 36.000 visitas desde a súa inauguración. Concibido e comisariado pola artista e investigadora Mónica Alonso, o proxecto destaca polo seu deseño innovador, que constrúe un percorrido sensorial para mergullarse na arte contemporánea. Máis de 80 obras de 63 artistas dan forma a un itinerario que transita polas paisaxes, símbolos e lembranzas asociadas ao paso do tempo e os cambios entre a primavera, o verán, o outono e o inverno en Galicia.
Galicia continúa a manter o liderado na taxa de escolarización 0-3 por cuarto curso consecutivo, cun 64 %. Os datos do Ministerio de Educación, Formación Profesional e Deportes referentes ao período lectivo 2026-2026 consolidan este primeiro posto, con 14 puntos por riba da media nacional. Ademais, Galicia é a única comunidade autónoma que está por encima da barreira do 60 % en niveis de escolarización no primeiro ciclo de Educación Infantil e supera en case 20 puntos o obxectivo da Unión Europea para o ano 2030, que é do 45 %. Estas cifras colocan a Galicia como referente no apoio ás familias e á infancia e son posibles grazas a medidas como a gratuidade das escolas infantís.
