martes, 8 de julio de 2025
A conselleira de Economía e Industria, María Jesús Lorenzana, destacou hoxe que o emprego industrial en Galicia crece por riba da media nacional, con 21.100 persoas ocupadas máis que en 2024, o que supón un incremento con respecto ao pasado ano do 12,14 por cento fronte ao 3,16 por cento do conxunto do Estado.
Nunha visita que hoxe realizou á planta de Stolt Sea Farm en Carnota (A Coruña), Lorenzana apuntou que Galicia foi a Comunidade na que máis subiu a ocupación no sector da industria, que pasou de rexistrar 173.800 persoas ocupadas no primeiro trimestre de 2024 a 194.900 no primeiro trimestre de 2025, a cifra máis alta de toda a serie histórica.
Tamén salientou os datos de produción industrial, que medrou no que vai de ano un 4,1 por cento, superando amplamente o crecemento medio estatal, que se sitúa no 1,5 por cento.
Estes datos amosan como estamos tendo un desenvolvemento industrial que se está consolidando. Unha industria, dixo, sustentable, comprometida co territorio, con altas cotas de innovación, que segue crecendo e que, ademais está diversificada e internacionalizada.
O proxecto de Stolt Sea Farm en Rianxo
Como exemplo puxo a Stolt Sea Farm, da que destacou que é unha gran empresa líder en acuicultura terrestre de alta tecnoloxía, principal provedora de rodaballo e linguado que exporta preto do 60 por cento da súa produción. Conta cunha capacidade de produción anual de 6.500 toneladas de rodaballo e 1.700 toneladas de linguado.
Fundada en Noruega en 1972, ten a súa sede en Santiago de Compostela e opera en cinco países con máis de 450 empregados e 14 granxas a nivel global. A metade delas, encóntrase en Galicia, cun total de sete granxas de cultivo de peixe plano situadas en diferentes zonas da costa galega onde traballan máis de 280 empregados: Cabo Vilán (Camariñas), Cervo (Lugo), Couso (Ribeira), Lira (Carnota), Merexo (Muxía), Palmeira (Ribeira) e Quilmas (Carnota), contabilizando máis de 280 empregados nestes centros de traballo.
Lorenzana lembrou que se trata dunha empresa que promove un dos 14 proxectos industriais estratéxicos declarados pola Xunta, cada un en distintas fases de tramitación, que supoñen un investimento de máis de 2.400 millóns de euros e máis de 4.360 postos de traballo. En concreto, prevé implantar en Rianxo (A Coruña) unha nova planta para a manipulación e envasado de peixe plano (rodaballo e linguado), que terá un investimento de 44 millóns de euros e xerará 173 postos de traballo directos.
O proxecto permitirá ampliar a capacidade de procesado e envasado que actualmente se centraliza na planta de Lira (Carnota), así como a automatización do procesado do rodaballo e linguado fresco que engorda nas granxas da empresa, o que permitirá unha maior valorización dos produtos acuícolas e un mellor aliñamento coa demanda do consumidor. No interior, instalarase unha planta de I+D+i, que permitirá afondar na colaboración xa existente cos centros tecnolóxicos e outros axentes relevantes do ámbito da investigación.
Actualmente, o proxecto só está pendente do visto bo da Xunta Consultiva en materia de Ordenación do Territorio e Urbanismo para a súa aprobación definitiva por parte do Consello da Xunta este mesmo ano.
Alfonso Rueda informou de que o Consello 'aprobou a orde para a posta en marcha do Bono Peixe' que ofrecerá 'ata 50 ' para mercar peixe e marisco frescos nos establecementos da comunidade adheridos. Unha medida coa que a Xunta busca 'incentivar o consumo' destes produtos galegos que son sinónimo 'de excelencia e calidade' por todo o mundo e 'facer unha chamada atención' sobre o descenso destes alimentos na dieta que se está a vivir 'a nivel nacional, europeo e mundial e do que Galicia non é allea'.
Galicia segue a ser un referente nacional en calidade ambiental e turística, con 137 bandeiras azuis e 54 sendeiros azuis recoñecidos en marzo. Sanxenxo mantén a súa posición á cabeza do conxunto estatal con 17 praias, 3 portos deportivos (o Real Club Náutico Sanxenxo, o Club Náutico Portonovo e o Porto Deportivo Juan Carlos I) e 1 centro azul (o Centro de Interpretación das Telleiras), ademais de ser o concello que conta co maior número de sendeiros azuis de toda España, cun total de 8 rutas. Galicia mantense entre as tres Comunidades con máis distintivos azuis (tras a Comunidade Valenciana e Andalucía) con 137 galardóns que inclúen praias, portos e centros azuis, ademais de 54 sendeiros azuis recoñecidos en marzo. De feito, concentra unha de cada seis bandeiras azuis concedidas este ano aos areais españois.
