sábado, 24 de octubre de 2026
A delegada territorial da Xunta en Ferrol, Martina Aneiros, participou esta mañá na presentación do I Campionato do Mundo de Hip Hop Coreográfico -categorías junior, young, absoluta e megacrew- que xuntará a próxima fin de semana no Pazo da Cultura de Narón a máis de 800 deportistas procedentes de Bélxica, Bulgaria, Chipre, Sudáfrica, Francia, Suecia, Italia ou España.
Aneiros destacou a gran evolución que está a experimentar o baile deportivo en Galicia dende que en 2021 se recoñeceu a especialidade deportiva do break e se creou a Liga Xunta de Galicia de Breaking, en consonancia coa aposta do Comité Olímpico Internacional (COI) polos deportes urbanos no programa olímpico. Dende aquela, a Federación Galega de Baile, creada en 2023, conta xa con 1.121 licenzas, das que o 83% son femininas.
Aneiros confirmou ademais a continuidade desta aposta polo baile deportivo coa creación o pasado ano da Liga Galega de hip hop, que esta fin de semana en Narón acollerá tamén a terceira proba puntuable do circuíto nas categorías baby, infantil e premium.
A delegada territorial subliñou a importancia de Narón no mundo do baile deportivo, tanto pola gran tradición que existe na cidade con varios clubs de diferentes especialidades, como pola súa traxectoria á hora de acoller algúns dos eventos máis importantes a nivel galego, estatal e internacional.
Por último agradeceu o labor do Concello de Narón, das federacións española e galega de Baile Deportivo, da World Dance Sport Federation (WDSF) e do Club de Baile Deportivo Narón por unir esforzos e ilusións para facer realidade este campionato.
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
