viernes, 30 de octubre de 2026
O conselleiro de Sanidade, Antonio Gómez Caamaño, destacou hoxe que a posta en marcha por parte da Xunta do Rexistro galego de persoas centenarias, Regace, sitúa Galicia nunha posición de referencia para o estudo da lonxevidade, posibilitando coñecer mellor as claves deste fenómeno e afrontar os retos que presenta.
O titular da carteira sanitaria do Executivo galego, acompañado da directora xeral de Planificación e Reforma Sanitaria, Sofía López, e da directora xeral de Saúde Pública, Carmen Durán, participou na presentación do Rexistro Galego de Persoas Centenarias, proxecto pioneiro en España.
O conselleiro incidiu en que, preto de 1.800 persoas de cen ou máis anos viven na comunidade galega, o que supón ao redor do 12 % de toda a poboación centenaria de España, un dato que fala da realidade demográfica de Galicia e reflicte unha oportunidade única para aprender, investigar e avanzar.
Tamén puxo en valor Gómez Caamaño que Galicia presenta un dos mellores resultados no que a esperanza de vida se refire: 81,19 anos para os homes e 86,83 para as mulleres, superando en ambos os casos a media estatal.
Sanidade preventiva e personalizada
Tal e como explicou o conselleiro, o Regace, ademais de ser un rexistro de datos e unha ferramenta estatística, alíñase coa Estratexia galega de saúde 2030 da Xunta, que aposta por unha sanidade cada vez máis preventiva, personalizada e baseada no coñecemento.
O Regace proporcionará información epidemiolóxica e máis precisa relacionada coas persoas centenarias e identificará factores asociados ao envellecemento saudable para orientar mellor as actuacións preventivas, asistenciais e sociosanitarias.
Xunto ao anterior, contribuirá a que os profesionais sanitarios dispoñan de máis información para ofrecer unha atención centrada nas características e circunstancias das persoas centenarias.
Os datos que ofrecerá o Regace -proseguiu Gómez Caamaño- serán fundamentais para planificar mellor os servizos sanitarios, personalizar a atención e orientar a investigación sobre a lonxevidade.
O conselleiro rematou a súa intervención indicando que a Xunta publicará proximamente a orde que regulará o funcionamento do Regace.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
