viernes, 23 de octubre de 2026
Na Coruña, a Biblioteca Pública Miguel González Garcés acollerá unha visita escolar, o propio día da efeméride, na que os e as participantes se mergullarán na sesión de Contos nas letras, e que se repetirá o 28 de abril. Este tipo de actividade tamén será a protagonista o venres, 25 de abril, data na que terán lugar os contacontos A pita e a xefa e Lonxe de todos en festas, pensados para os máis pequenos e pequenas. Ademais, ata finais de mes pode verse a mostra bibliográfica Un libro, un soño, creada ex profeso co gallo desta celebración.
A Biblioteca Pública de Lugo tamén conta cunha exposición ao redor do Día do Libro, que se verá completada con catro visitas guiadas para os colexios, que se organizarán mañá, mércores, e o 30 de abril, de 10 a 11 horas. A maiores, tamén o mesmo 23 de abril está prevista unha sesión de contos de tradición oral da recoñecida narradora Carolina Rueda, destinada ao público adulto.
Esta programación estará completada con dous encontros con autores, Ivet Núñez e Francisco Narla, que se celebrarán os días 25 e 30 de abril, respectivamente, aos que se lle engade a sesión de contacontos de Migallas Teatro que leva por título Garavanciño, tamén o día 25. Incorpóranse a estas actividades unha cita culinaria, o 28 de abril, con profesionais da restauración da cidade e que incluirá unha degustación baseada no libro de receitas homenaxe á marquesa de Parabere, María Mestayer.
Xa en Ourense, a Biblioteca Pública Nós está a conmemorar Día do Libro con catro exposicións bibliográficas, nas que as persoas visitantes poden profundar nas publicacións denominadas Pop-u, na literatura clásica e tamén na adaptación á banda deseñada de novelas recoñecidas. Engádeselle a este calendario dúas sesións de contacontos o 24 de abril. Está dirixida a bebés, de 1 a 3 anos de idade, que deberán ir acompañados dunha persoa adulta.
Ademais, a Biblioteca Nós transformarase o vindeiro venres, 25 de abril, nun escenario onde os contos populares cobrarán vida. Para iso, de 21 a 22,30 horas, as familias que previamente se inscriban gozarán dunha experiencia única, na que descubrirán este espazo e estas historias recreadas dun xeito orixinal e diferente. Completará esta programación un concerto, o sábado, 26 de abril, en colaboración co Conservatorio de Música de Ourense.
En Pontevedra, a Biblioteca Pública Antonio Odriozola ten xa instalada ata final de mes unha mostra bibliográfica que convida a unha viaxe pola cidade a través das páxinas de novelas. A esta exposición sumáselle, o mesmo 23 de abril, o obradoiro Scriptorium, onde os rapaces e rapazas poderán achegarse á importancia dos copistas, dos códices e dos instrumentos básicos para encadernación deste tipo de publicacións. Dúas xornadas máis tarde, o venres 25, tamén poderán gozar dunha sesión de contacontos ilustrados e musicados por Enrique Labarta, que guiará a cativada nun obradoiro de debuxo.
Unha axenda moi cultural
Na capital galega, a Biblioteca Pública Ánxel Casal conta cunha ampla axenda para celebrar o Día do Libro cunha ducia de actividades, nas que se inclúen tres mostras bibliográficas e unha exposición de gravados do século XIX. Todas elas poden visitarse ata finais deste mes.
En todo caso, a véspera do 23 de abril xa comeza a conmemoración desta efeméride cun obradoiro de cómic autobiográfico da man de Denis Carballás, ás 17,30 horas, e que está dirixido ao público mozo e adulto. Xa a mesma data do Día do Libro haberá unha visita guiada ás 12 horas, que se completará cun sorteo de catro lotes de libros e cunha ruta divulgativa por Compostela para coñecer a pegada da Inquisición en Compostela.
Ao longo desta semana, as persoas interesadas poderán participar na votación das cinco novelas finalistas da XVIII Edición Premio Novela Europea Casino de Santiago, a través dunha caixa de correo instalada na biblioteca. Ademais, o venres 25 presentaranse os libros gañadores do certame Simbad para o Recordo. A continuación, o sábado 26, o público familiar poderá desfrutar do espectáculo musical de Pablo Díaz Contando números, cantando cores.
Finalmente, a Biblioteca Pública Juan Compañel de Vigo realizará visitas guiadas o 23 de abril, ás 12,00 e ás 18,00 horas, nas que os participantes poderán descubrir a mostra Anatomía dun libro, coa que se pretende dedicarlle unha exposición ao libro en si mesmo, desde os elementos constitutivos aos manuais e materias que o tratan como obxecto.
A primeira etapa da xira de A Gaivota, ensaio aberto desenvolveuse do 12 ao 15 de outubro na sala Atahualpa do Teatro El Galpón de Montevideo, en coprodución con esta institución e no marco do Festival Internacional de Artes Escénicas de Uruguai, FIDAE. O programa comprendeu sete representacións nas que Déborah Vukuić compartiu escenario con Camila Durán e Claudia Trecu, que entraron no lugar das actrices galegas Uxía Suevos e Mercedes Castro. A magnífica resposta do público uruguaio contou cunha destacada presenza da comunidade galega, que converteu as funcións nun espazo de encontro arredor da lingua e da creación escénica de Galicia. Esta acollida precede a chegada á Arxentina, onde Déborah Vukuić compartirá escenario coas actrices locais Eugenia Alonso e Carmela Rivero.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
