miércoles, 14 de octubre de 2026
Neste senso, fixo fincapé no estilo de goberno da Xunta: un modelo baseado 'no rigor, na estabilidade e na acción'.
Rueda destacou na súa intervención algúns fitos acadados neste primeiro ano, facendo especial mención aos avances en materia de sanidade, educación, economía e política social. Entre eles, a consolidación do calendario vacinal máis avanzado de Europa; a educación universitaria gratuíta, sendo Galicia pioneira neste eido; a aposta pola vivenda pública, duplicando o parque público; ou a reactivación do rural galego, con Galicia como líder en produción láctea a nivel estatal.
Tamén puxo en valor o liderado de Galicia en enerxías renovables (cun 84,6% da súa enerxía procedente de fontes limpas) e o traballo en sectores como a automoción, a biotecnoloxía, a loxística e a industria conserveira.
Un proxecto que non deixa a ninguén atrás
O titular do Executivo galego incidiu na importancia de gobernar 'con alma, esixencia e sentidiño', e reafirmou que Galicia 'non deixa a ninguén atrás'. Mencionou a posta en marcha de medidas pioneiras como o Bono Coidado, o reforzo de prazas públicas en política social (superior ás 16.000) e a Estratexia Retorna, que permitiu no último ano a volta de 8.500 galegos do exterior, o mellor dato histórico rexistrado.
Tamén defendeu con firmeza o papel de Galicia na defensa das súas competencias, en especial no relativo á recente transferencia de xestión do litoral, reclamando 'un trato xusto sen complexos, con responsabilidade e sen renuncias'.
O presidente quixo tamén facer un recoñecemento público ao seu equipo de goberno, destacando o labor conxunto e a cohesión do Executivo. 'Aquí gañamos e erramos xuntos. Porque isto é un equipo, e así se comporta', afirmou.
Concluíu asegurando que o balance deste primeiro ano é positivo, pero advertindo que 'o mellor está por vir'. 'Galicia', dixo, 'está preparada para liderar, para innovar e para coidar o seu territorio cun proxecto estable e un estilo propio: o estilo Galicia'.
O conselleiro de Presidencia, Xustiza e Deportes, Diego Calvo, informou esta mañá de que o Consello deu luz verde aos textos 'dos estatutos das mulleres do rural e do sector marítimo-pesqueiro de Galicia', que entran así na súa última fase de tramitación coa súa remisión ao Consello Consultivo para que emita o informe preceptivo 'e estean aprobados a finais de ano'. Este trámite, que coincide coas vésperas do Día Internacional das Mulleres Rurais -que se conmemora cada 15 de outubro- busca 'avanzar no recoñecemento das mulleres' destes eidos e 'mellorar o seu acceso a novas oportunidades e recursos'. Ambos documentos buscan ademais, tal e como explicou Calvo, visibilizar a súa contribución ao desenvolvemento territorial; garantir o seu acceso en igualdade a dereitos, oportunidades e recursos; fomentar a contratación feminina en profesións masculinizadas ou impulsar a titularidade compartida en explotacións e embarcacións.
A economía galega medrará catro décimas máis do previsto hai un ano, cando se elaboraron os orzamentos vixentes. Así se desprende do Informe sobre as previsións macroeconómicas que se incluirán nos orzamentos da Xunta de Galicia para o ano 2027, elaborado polo Instituto Galego de Estatística (IGE) e que hoxe foi avalado pola AIReF. Deste xeito, segundo constata o documento, Galicia medrará máis do previsto para este ano. Non en van, se en xullo, cando se aprobou o teito de gasto non financeiro, a Comunidade xa mellorou a previsión de crecemento que estaba nos orzamentos para este ano en dúas décimas, pasando do 1,9 % ao 2,1 %, agora volve a facelo, mellorando noutras dúas décimas (ata o 2,3 %) a previsión para o peche de 2026.
