miércoles, 14 de octubre de 2026
O conselleiro de Sanidade, Antonio Gómez Caamaño, presidiu esta mañá unha reunión cos coordinadores de transplantes dos hospitais públicos das sete cidades e da Coordinadora Autonómica de Transplantes para avaliar os datos do ano 2024, onde destacou o bo facer dos equipos galegos tras o récord histórico acadado o pasado ano.
Na reunión, na que tamén participou a directora da Axencia Galega de Sangue, Órganos e Tecidos (ADOS), Marisa López, o titular de Sanidade puxo en valor a xenerosidade da poboación galega onde 137 doantes de órganos fixeron posible que a comunidade acadase os 424 transplantes en 2024, un 28 % máis con respecto ao anterior exercicio.
En concreto, Galicia rexistrou o pasado ano un total de 208 transplantes de ril, 118 de fígado, 4 de páncreas, 30 de corazón e 64 de pulmón.
Son os mellores resultados da historia da Sanidade galega incidiu Gómez Caamaño, ao tempo que trasladou o seu orgullo pola excelencia acadada polos seus equipos de profesionais.
Ademais, Galicia pechou o ano 2024 coa maior taxa de doantes de órganos por millón de habitantes cun 50,7, o que permitiu que tamén rexistrase a lista de espera para transplante máis baixa da súa historia.
Galicia, máis de catro décadas de transplantes
O Servizo Galego de Saúde acadou en 2024 a cifra máis alta deste tipo de intervencións desde que no ano 1981 no Hospital Público da Coruña se realizase o primeiro transplante de órganos na comunidade.
O pasado mes de febreiro a comunidade realizou o seu transplante número 10.000 tras a implantación xa hai máis de 40 anos dun programa que se encontra completamente asentado no sistema sanitario público.
Neste período, a solidariedade de case 3.500 persoas posibilitou que Galicia se situase como referente no ámbito da doazón de órganos.
Segundo os datos acumulados, o transplante de ril destaca nestas catro décadas con 5.168 intervencións realizadas; seguido do de fígado, con 2.803; do de corazón, con 959; de pulmón, con 942; e de páncreas con 128.
Un total de cinco candidaturas galegas optan como finalistas aos XIX Premios Nacionais de Artesanía, convocados polo Ministerio de Industria, Comercio e Turismo. Galicia convértese así na comunidade con máis finalistas, con candidaturas en catro das cinco categorías. En concreto, os ceramistas Barreiros Artesanía e a deseñadora e redeira Amalia Puga optan ao Premio Produto, mentres que Sandra Vilas é candidata por segundo ano consecutivo ao Premio Emprendemento. Na categoría Promociona para Entidades Privadas, resultou finalista a asociación APAMP e a súa marca A Casa Rodante; e no Promociona para Entidades Públicas, é candidata a Fundación Pública Artesanía de Galicia.
O conselleiro de Presidencia, Xustiza e Deportes, Diego Calvo, anunciou que a Xunta vai desenvolver o título II da Lei de Xuventude de Galicia' para mellorar a calidade dos servizos que se prestan á mocidade galega con medidas para 'incrementar o número de monitores nos campamentos ou flexibilizar os requisitos para poder exercer este traballo'. Así se recolle no proxecto de decreto co que se actualiza o segundo título desta normativa que foi avaliado hoxe no Consello da Xunta e que se publicará nos vindeiros días no Diario Oficial de Galicia 'despois dun longo proceso de participación e diálogo cos axentes implicados' a través de distintos espazos de escoita activa.
