jueves, 5 de noviembre de 2026
Marta Villaverde puxo en valor o liderado de Galicia, que preside o Grupo de Traballo de Pesca desta organización, cun papel activo no proceso de avaliación da actual PPC e trasladando ás máximas instancias nacionais e comunitarias a posición aprobada no Consello Galego de Pesca. Unha postura recollida no Decálogo Estratéxico de Galicia na defensa dos seus intereses ante a revisión da PPC e no ditame sobre a proposta de MFP e o seu impacto nos fondos dedicados á pesca.
A titular de Mar insistiu en que resulta irrenunciable a existencia dun fondo propio e independente, dotado cos recursos financeiros suficientes, para atender os principais retos actuais. Nesta liña, reclamou unha asignación xusta e equilibrada, acorde ás singularidades do sector, co obxectivo de non poñer en risco a súa viabilidade. No horizonte, desafíos como a remuda xeracional, a descarbonización da frota ou a protección da cadea mar-industria da competencia desleal de terceiros países, con regulacións menos exixentes en materia laboral e ambiental, reforzando a soberanía e seguridade alimentaria do continente.
A responsable autonómica salientou a necesidade de que as rexións como Galicia, altamente dependente da pesca, deban ter un papel activo na toma de decisións e non ser relegadas a meras executoras dos fondos. Unha maior participación que contribuiría á eficacia no desenvolvemento das políticas comunitarias que tamén deben procurar a resiliencia da pesca artesanal, a preservación do patrimonio marítimo ou o fomento da economía azul. Un modelo de coxestión sustentado no coñecemento científico e nun enfoque ecosistémico, esencial para evitar precedentes como o veto á pesca de fondo que, agardamos, sexa rectificado.
DG Mare
No marco deste evento, a conselleira do Mar reuniuse coa directora xeral de Asuntos Marítimos e Pesca (DG Mare) da Comisión, Charlina Vitcheva, a quen lle reiterou as inquedanzas do sector galego de cara aos desafíos de futuro e ás negociacións que se están levando a cabo en Bruxelas. No encontro tamén urxiu á responsable comunitaria a acadar unha resposta rápida e satisfactoria ao veto á pesca de fondo nas 87 zonas do Atlántico nororiental, que tanto afecta á frota pesqueira galega e que causa unhas perdas duns 216 millóns de euros anuais. Esta reunión súmase á celebrada o pasado martes na capital comunitaria co comisario europeo de Pesca e Océanos, Costas Kadis, na que lle fixo entrega do último ditame do Consello Galego de Pesca. Na xuntanza, puxo en valor a oposición dos principais grupos do Parlamento Europeo á proposta de MFP e reclamou unha política pesqueira que atenda de xeito equilibrado os aspectos económicos, sociais e ambientais.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
