viernes, 16 de octubre de 2026
Galicia aspira a reducir un 75% as emisións de dióxido de carbono antes de 2030 e que a xeración eléctrica renovable chegue ao 85% dentro do seu obxectivo de acadar a neutralidade climática en 2040. Estes son algúns dos retos recollidos no II Plan Rexional Integrado de Enerxía e Clima (PRIEC 2030) e que a conselleira de Medio Ambiente e Cambio Climático, Ángeles Vázquez, destacou durante a presentación deste instrumento para actuar fronte ao quecemento global.
Este segundo PRIEC pretende guiar de forma transversal as políticas galegas ao abeiro da Estratexia Galega de Cambio Climático e dar continuidade ao desenvolvido entre 2019 e 2024, que permitiu que Galicia reducise a emisión de gases de efecto invernadoiro a un ritmo tres veces superior ao de España e da UE así como que sexa a comunidade na que máis se reduciron as emisións contaminantes (preto do 60%), por enriba incluso dos obxectivos europeos para 2030.
A responsable autonómica explicou que neste novo documento se inclúen 93 medidas específicas coas que se prevé mobilizar un investimento de preto de 1.800 millóns de euros. A finalidade última é consolidar a posición de privilexio da comunidade autónoma na loita contra o cambio climático e reforzar cuestións como a capacidade de absorción de dióxido de carbono, un eido no que Galicia é responsable dunha de cada cinco toneladas capturadas no conxunto de España.
A conselleira incidiu en que este plan é un paso máis do Executivo galego na súa estratexia para implicar a toda a sociedade na adaptación ao cambio climático e os seus efectos na liña doutras actuación como a creación da marca Galicia Refuxio Climático, a posta en marcha da iniciativa Mocidade polo Clima, a creación da Rede Local polo Clima ou a Alianza Galega polo Clima, esta última xa con máis de 190 entidades público-privadas adheridas.
Ángeles Vázquez salientou que a Xunta busca avanzar na descarbonización con medidas como o impulso de infraestruturas verdes -para lograr espazos urbanos e periurbanos máis saudables-, a mellora dos sistemas de saneamento da auga, a aposta por medios de transporte máis eficientes e a aposta pola innovación e a investigación mediante proxectos como os financiados pola compra pública innovadora.
Neste sentido, algunhas das medidas incluídas no plan xa están a dar os seus froitos, como a posta en marcha da Estratexia Galega de Infraestrutura Verde e da conectividade e restauración ecolóxicas, cunha liña de axudas de ata 60.000 euros para apoiar aos concellos en proxectos que busquen solucións verdes e naturais aos efectos do cambio climático. En total, destínase un orzamento de 2 millóns de euros a impulsar refuxios climáticos urbanos, o aumento da biodiversidade e a mellora das infraestruturas verdes e fluviais.
Innovación
Mentres, no eido da innovación e da investigación, a conselleira puxo en valor o acerto de Galicia ao lograr por primeira vez que dous proxectos que teñen como obxectivo paliar os efectos do cambio climático accedesen a fondos europeos a través dun proceso de compra pública innovadora. Trátase dos proxectos AguaTech, promovido por Augas de Galicia para mellorar a xestión das masas de auga, e SICLE-CO2, para a creación dunha plataforma coa que impulsar a absorción das emisións de dióxido de carbono.
Estas dúas iniciativas suman un investimento total de 14,3 millóns de euros, dos que 7,7 millóns de euros serán financiados con recursos europeos acadados na convocatoria do proceso competitivo de compra pública innovadora, unha mostra do punteiras e relevantes que son ambas actuacións a nivel estatal e europeo.
Ángeles Vázquez concluíu sinalando que o PRIEC 2030 é un instrumento transversal que permitirá a Galicia consolidar a súa posición de vangarda para afrontar os grandes retos climáticos actuando desde o eido local cara ao global.
O xurado dos Premios da Cultura Galega 2026 reuniuse hoxe en Santiago de Compostela para outorgar os recoñecementos desta edición. A xuntanza, que tivo lugar na Cidade da Cultura de Galicia, estivo presidida polo conselleiro de Cultura, Lingua e Xuventude, José López Campos. Ao remate do acto, fíxose público o fallo nas distintas categorías propostas, resultando galardoados María Solar, en Letras; Almudena Fernández Fariña, en Artes Visuais; a compañía Elefante Elegante, en Artes Escénicas; a Asociación Galega de Empresas Musicais, en Música; Alfonso Zarauza, na categoría Audiovisual; Espazo Lectura, en Lingua; o Obradoiro de Gaitas Seivane, en Patrimonio Cultural; e o Festival EmigraSON, en Proxección Exterior.
O obxectivo desta rede de recursos é acompañar ás persoas con discapacidade ao longo da súa vida, desde os primeiros anos ata que se fan maiores, ofrecendo respostas axeitadas a cada etapa e a cada necesidade. Desde o ano 2016, o número de unidades de atención temperá aumentou ata as 57. Estes servizos públicos e gratuítos dirixidos a nenas e nenos de 0 a 6 anos de idade son fundamentais para detectar, previr e actuar ante trastornos de desenvolvemento. A Rede galega de atención temperá na actualidade chega a máis de 200 concellos e a 6.000 familias.
