sábado, 24 de octubre de 2026
Tradicións e rituais, música, espectáculo, gastronomía, humor e moita festa percorren as catro provincias galegas durante un mes. A programación destas citas está recollida no Entroido en Galicia, a guía editada por Turismo de Galicia sobre as celebracións de carnaval que teñen a categoría de interese turístico na comunidade e que se pode consultar desde hoxe na súa web www.turismo.gal
A variada programación que promove Turismo de Galicia apunta a dúas das liñas de traballo central da Xunta en materia turística recollidas na súa Estratexia de Turismo de Galicia 2030. Por unha banda, a aposta por diversificar a oferta de ocio na comunidade, cara propostas que inclúan unha valorización do patrimonio cultural, material e inmaterial, pero tamén da gastronomía e de zonas máis alonxadas dos grandes núcleos de visitantes. Pola outra, a posta en valor dos Entroidos como datas idóneas para coñecer Galicia quere avanzar na desestacionalización da oferta fora de tempada. Ademais, a programación do carnaval inclúe actividades para todo tipo de públicos, desde idades infantís a adultas.
Estas son unhas festas que van máis aló da propia semana do Entroido do sábado, 1 de marzo, ao mércores de Cinza, o día 5 de. Xa desde o 7 de febreiro comezaron nalgunhas das citas os festexos, que se prolongarán en varias localidades ata o domingo 9 de marzo. As celebracións manteñen o seu carácter ancestral, lúdico e tamén humorístico, na forma de máscaras, desfiles, concursos de disfraces e comparsas. A rapazada intégrase con actividades específicas, como desfiles e obradoiros, que permiten achegar as tradicións á xente nova para darlles así continuidade.
A isto engádese unha oferta gastronómica variada propia do entroido en Galicia, que ten como eixos centrais o cocido e os produtos derivados do porco xunto cos doces, como filloas ou orellas. Confórmase así unha proposta turística completa e orixinal, para todas aquelas persoas que queiran gozar do ocio e da comida sen renunciar á cultura.
O Entroido na provincia de Ourense
Con sete das once citas recollidas na programación, a meirande parte dos festexos concéntranse na provincia de Ourense. Xinzo de Limia, Verín, Viana do Bolo, Laza, Manzaneda, Maceda e Vilariño de Conso exhiben os seus protagonistas en pasarrúas, folións, charangas, embaixadas entre parroquias e fareladas.
As persoas que visiten estas localidades poderán coñecer de primeira man ás personaxes principais dos festexos. As pantallas de Xinzo, os cigarróns de Verín, os boteiros de Viana e Vilariño, os peliqueiros de Laza, as mázcaras de Manzaneda e os felos de Maceda están acompañados por mecos, lardeiros e lardeiras, raíñas e reis e Don Carnal. Ademais do tradicional cocido, distintas citas gastronómicas achegan a variedade dos produtos da zona, como son a festa da androlla, a do cabrito ou a do porco ao espeto.
Celebrando o entroido por todo o territorio
As festas de interese turístico de Galicia espállanse máis aló da provincia ourensá. Madamas e galanes efectúan as súas danzas en Cobres, Pontevedra, percorrendo durante os días grandes da celebración os distintos barrios. Na mesma provincia, en Marín, a oferta cultural inclúe unha noite de cantos de taberna, desfiles de comparsas e carrozas e concurso de filloas, entre outros.
Entre oito concellos das provincias de Pontevedra e A Coruña despréganse os Xenerais da Ulla e os seus Correos. Durante o día, estas figuras engalanadas percorren a cabalo distintas parroquias de Boqueixón, A Estrada, Santiago, Silleda, Teo, Touro, Vedra e Vila de Cruces na compaña de abandeirados, coros e comparsas.
O Entroido na provincia de Lugo ten un dos seus grandes expoñentes en Foz, que ademais das comparsas e desfiles celebra o luns de carnaval o seu tradicional Baile do Farolillo.
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
