miércoles, 15 de abril de 2026
Galicia comeza 2025 con 121.320 persoas no paro, a cifra máis baixa nun mes de xaneiro desde que hai rexistros (1996), e acumula 16.559 novas afiliacións á Seguridade Social en relación con xaneiro de 2024, acadando, con 1.067.089 cotizantes, o mellor dato neste mes desde hai 16 anos. O dato de persoas desempregadas sitúanos ademais como a cuarta Comunidade con maior porcentaxe de caída no último ano, máis dun punto por riba da media española. Así o destacou hoxe o conselleiro de Emprego, Comercio e Emigración, José González, durante a valoración dos datos de paro e de afiliacións do pasado mes de xaneiro.
En relación coa comparativa interanual, José González salientou que o desemprego cae nas catro provincias galegas, nas sete grandes cidades e en todos os colectivos prioritarios nas políticas activas de emprego da Xunta como os menores de 30 anos, as mulleres e os parados de longa duración. Así, a cifra de desempregados con menos de 30 anos (13.909) é a de mulleres (70.083) son as máis baixas nun xaneiro de toda a serie histórica (desde 2005). Canto ao dato de parados de longa duración (59.604), cae un -7,04 % con respecto a hai un ano, mellorando o dato de novembro de 2008.
Xaneiro reflicte, así mesmo, que Galicia segue afianzando o seu mercado laboral pivotando sobre sectores estratéxicos clave. As actividades económicas nas que máis está a descender o paro, de xeito sostido no tempo, son o sector primario, a construción e a industria, na mesma liña dos datos que tamén reflicte a última enquisa da EPA publicada hai uns días. Tamén destacan outros eidos que está a ser xeradores de emprego, como a educación, as actividades sanitarias ou a hostalaría.
Canto ás afiliacións á Seguridade Social, o titular de Emprego salientou que Galicia pechou o mellor mes de xaneiro desde 2009, acadando os 1.067.089 cotizantes que supoñen un aumento con respecto a hai un ano dun 1,58 % (16.559 novas afiliacións).
Sobre a contratación, o conselleiro sinalou que aínda que descende lixeiramente canto ao mes de decembro un comportamento habitual neste mes do ano debido á finalización da campaña de Nadal aumentan nun 26,49 % as contratacións indefinidas, máis de dez puntos por riba da media estatal.
Atendendo á evolución dos datos, o conselleiro concluíu que esta tendencia positiva reflicte que Galicia medra a un ritmo conxunto, sen deixar a ningún colectivo atrás e dando resposta ás necesidades que hoxe ten o tecido produtivo, diversificando ás áreas e xeración de emprego. Nesta liña, comprometeu o traballo da Xunta da man do empresariado e tecido produtivo galego de cara a seguir avanzando nun mercado laboral dinámico, inclusivo e de máxima calidade.
O xornalista galego de elDiario.es José Precedo, que defendeu o dereito ao segredo xornalístico ante o Tribunal Supremo, é o gañador do XXII Premio Xornalistas de Liberdade de Prensa, convocado polo Colexio Profesional de Xornalistas de Galicia coa colaboración do Concello de Pontevedra. Precedo recibirá o premio en Pontevedra o vindeiro 9 de maio na Casa Consistorial. A sala de prensa do Concello de Pontevedra acolleu o anuncio da candidatura gañadora da vixésimo primeira edición do Premio Xornalistas de Liberdade de Prensa, organizado polo Colexio Profesional de Xornalistas de Galicia coa colaboración do Concello de Pontevedra. O acto contou coa presenza do alcalde Miguel Anxo Fernández Lores, a decana do Colexio Belén Leal e o secretario do premio Darío Janeiro.
Esta edición do Encontro de Artes Novas contará coa participación de talentos recoñecidos como a escritora, comisaria e podcaster Sonia Fernández Pan, que realiza desde 2021 a serie de podcasts The Tale and The Tongue co Instituto de Arte, Xénero e Natureza da Escola Superior de Deseño e Arte de Basilea. Ou a dupla artística Clo-Plas, unha proposta sonora única e radical da poeta e xornalista Xiana Arias e o artista e investigador Berio Molina, que fusionan versos e electro-pop minimalista coa oralidade popular da Fonsagrada. O programa inclúe tamén cunha conversa co profesor e investigador en Filosofía da Tecnoloxía, Pablo Sanguinetti, autor do libro Tecnohumanismo. Por un diseño narrativo y estético de la inteligencia artificial e de numerosos artigos académicos e divulgativos sobre a intersección entre tecnoloxía, humanidades e creatividade.
