martes, 11 de agosto de 2026
O presidente da Xunta, Alfonso Rueda, destacou hoxe que Galicia acadou en 2024 cifras récord tanto en transplantes como doazón de órganos, un fito histórico para a sanidade pública galega que é, segundo salientou, para sentirse orgullosos.
Durante a súa intervención no acto de presentación dos datos de 2024 en Santiago, Rueda agradeceu o labor dos sanitarios que fan posible este tipo de intervencións e a súa profesionalidade; o traballo de difusión que fan os transplantados e a xenerosidade das familias dos doantes. Nesta liña, fixo fincapé en que a solidariedade é a clave de que España sexa un referente en materia de transplantes a nivel mundial, agradecendo ás persoas e ás familias que decidiron que podían seguir tendo unha parte da súa vida dándolle a vida a outros.
O Servizo Galego de Saúde realizou 424 transplantes durante o pasado ano, o que supón a maior cifra desde que en 1981 se comezaron a practicar este tipo de intervencións na comunidade e un 28% máis que no 2023, cando se rexistraron 331. Produciuse un incremento en todos os programas de transplante salvo no de páncreas onde se mantiveron os datos (catro). En concreto, realizáronse 208 transplantes renais (un 24% máis que no 2023 e cifra récord), 118 de fígado (+34%), 64 de pulmón (+31%, tamén máximo histórico) e 30 de corazón (+36%).
Ademais, tal e como salientou Rueda, Galicia rexistrou no 2024 a maior taxa de doantes de órganos por millón de habitantes (50,7) desde a creación da Organización Nacional de Transplantes no 1989. Este dato supón un incremento dun 26% respecto a 2023 e que contribuíu a que Galicia pechase o ano coa menor cifra de pacientes á espera de transplante da súa historia (193).
Perfil dos doantes
Preto de 3.500 persoas teñen doado os seus órganos en Galicia desde o inicio do programa de transplantes en 1981. A idade media sitúase nos 60 anos. A persoa doante de maior idade no 2024 tiña 87 anos e houbo catro menores.
Nesta liña cómpre destacar a posta en marcha hai máis dunha década do programa de doazón en asistolia que permitiu incrementar o número de doazóns, así coma a Lei orgánica 3/2021 da regulación da eutanasia, que contempla que estas persoas deixen por escrito o seu desexo de doar os órganos. Desde a entrada en vigor desta normativa houbo unha ducia de doazóns deste tipo en Galicia que permitiron transplantar a 45 persoas.
A estas cifras hai que sumar a doazón de tecidos que acadou os 179 doantes de córneas, 59 de ósos e 24 de segmentos vasculares, segundo os datos de 2024 da Axencia de Doazón de Órganos e Sangue (ADOS). Ademais, hai 126.000 galegos e galegas que teñen a tarxeta que lles acredita como doantes de órganos, dos que 2.453 se rexistraron durante 2024. Na actualidade 8 de cada 10 familias din si a doazón en Galicia.
Outros fitos do 2024
Entre os 424 transplantes practicados o ano pasado en Galicia cómpre destacar que oito foron de urxencia cero -seis de corazón, un de fígado e outro de pulmón- e que o equipo do Complexo Hospitalario Universitario da Coruña (Chuac) logrou realizar dez transplantes en só 36 horas grazas a dous doantes.
Ademais, un total de 107 galegos e galegas foron transplantados grazas a doantes doutras comunidade e 106 pacientes doutras rexións recibiron un órgano procedente de Galicia. Ademais, a comunidade tamén enviou órganos a Italia, Portugal e Francia, países cos que colabora España en materia de transplantes.
Cara aos 10.000 transplantes
Galicia inauguraba en xaneiro de 1981 o programa de transplantes cunha intervención de ril no Chuac. Desde entón, realizáronse 9.975 cirurxías deste tipo nos hospitais públicos da Coruña e de Santiago. A previsión é que ao longo deste mes se poida alcanzar a cifra dos 10.000 transplantes na comunidade galega.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
