domingo, 31 de mayo de 2026
O presidente da Xunta, Alfonso Rueda, informou hoxe de que o Goberno autonómico vai pagar esta mesma semana o 90% das axudas directas da Política Agraria Común (PAC) que faltaban por ingresar aos gandeiros e agricultores galegos. Trátase de 99,3 millóns de euros.
Este saldo corresponde ao resto das axudas directas da PAC que non se aboaron no anticipo realizado na segunda quincena do mes de outubro e inclúe tamén o 20% que faltaba por pagar naquelas liñas en que xa se anticipara unha parte da axuda. Tamén se vai realizar o pagamento do 100% das axudas a zonas con limitacións naturais (ZLN), é dicir, outros 17,3 millóns de euros. Polo tanto, estes pagamentos da PAC desta campaña en Galicia suporán un desembolso de preto de 117 millóns de euros, que beneficiarán arredor de 23.000 agricultores e gandeiros, segundo indicou o presidente.
Rueda salientou a axilidade da Xunta co pago das axudas directas, que son as máis importantes da PAC e lembrou que o resto de achegas se irán pagando progresivamente nos vindeiros meses.
Cómpre puntualizar que a regulamentación comunitaria establece que os pagamentos da PAC poden comezar a realizarse a partir do día 16 de outubro de cada ano. O prazo para proceder ao pagamento do resto das axudas directas da PAC a través do fondo agrario Feaga, o pagamento do saldo, comeza o día 1 de decembro de 2024, de maneira que todas as axudas deberán estar pagadas, como máis tarde, o 30 de xuño de 2025.
Galicia, segundo lembrou Rueda, adiantou un mes o pago da primeira parte das axudas directas ao pasado mes de outubro cando se ingresaron 43 millóns de euros.
Neste sentido, hai que salientar que a PAC ofrece un firme apoio a agricultores e agricultoras tratando de proporcionarlles un nivel de vida razoable. Por tanto, a PAC proporciona estabilidade nos ingresos, seguridade e mellora a rendibilidade do sector agrario. Desta maneira, favorece o mantemento da actividade agraria en particular, pero tamén do sistema alimentario no seu conxunto.
Nesta liña, a PAC define as condicións que permiten que o sector agrario cumpra as súas importantes funcións proporcionando beneficios, xa non só para o sistema agroalimentario, senón tamén para os consumidores e a sociedade en xeral. Vantaxes na subministración de alimentos acordes coas exixencias da consumidores, na conservación do ambiente e na loita contra o cambio climático, na fixación de poboación e xeración de emprego no medio rural e na xeración directa e indirecta de traballo no sistema agroalimentario.
A Rede de detección de raios de MeteoGalicia contabilizou no que vai de ano un total de 12.825 raios, o que supón o 80% de todos os rexistrados durante o pasado 2025. O 42% dos raios rexistrados este ano -5.371- caeron a pasada fin de semana. En concreto, entre o venres 22 e o luns 25 de maio e, ademais, ese venres e o domingo 24 foron as xornadas con máis raios de todo o ano. O que aconteceu a semana pasada é que se deron as circunstancias perfectas para que se produciran esas treboadas: aire moi cálido en superficie procedente do norte de África -como quedou demostrado pola presenza de partículas de polvo sahariano en suspensión- e frío en altura nas capas medidas e altas da atmosfera.
Galicia, once comunidades autónomas -Andalucía, Cantabria, A Rioxa, Rexión de Murcia, a Comunidade Valenciana, Aragón, Canarias, Estremadura, Illas Baleares, Madrid e Castela e León- e as cidades autónomas de Ceuta e Melilla veñen de enviar unha carta á comisaria europea de Medio Ambiente, Resiliencia Hídrica e Economía Circular Competitiva, Jessika Roswall, na que defenden o rigor técnico da súa xestión do lobo e denuncian a actitude arbitraria do Goberno central nesta materia, que pretende declarar o estado de conservación desta especie como desfavorable cando os datos científicos indican que é favorable.
