miércoles, 14 de octubre de 2026
O director de Turismo de Galicia, Xosé Merelles, presentou hoxe Reinventio, un espectáculo galego de gran formato que combina maxia, danza e artes circenses nun relato visual sobre a capacidade de reinventarse e recuperar a ilusión que conta co apoio de Turismo de Galicia e que busca converterse nun reclamo turístico do Nadal galego.
Como explicou durante a presentación, a iniciativa será un importante aliciente para visitar as nosas cidades fóra de temporada alta e se referiu ao positivo impacto que poderá ter desde o punto de vista turístico. Desde hai anos apostamos por un modelo que diversifique a oferta e rompa a estacionalidade tendo moi en conta que estamos a comprobar que o inverno galego ten un importante potencial turístico. Así o constata, por exemplo o crecemento entre un 3 e u 4% dos viaxeiros en meses como xaneiro ou febreiro deste ano, engadiu Xosé Merelles.
Neste sentido, felicitou aos organizadores de Reinventio por presentar unha proposta que vén avalada polo éxito do espectáculo Inventio, unha produción impulsada no marco do Xacobeo 21-22 que fusionaba danza, ilusionismo e música arredor do simbolismo do Camiño de Santiago e que serve de base para esta nova proposta.
A xira galega 2025/2026 de Reinventio confirma nove funcións en sete cidades. O espectáculo estrearase o 12 e 13 de decembro no Teatro Jofre de Ferrol, e continuará por Vigo (14 de decembro, Teatro Afundación), Ourense (20 de decembro, Auditorio Municipal), Pontevedra (26 de decembro, Teatro Afundación), Lugo (27 de decembro, Auditorio Fuxan os Ventos), A Coruña (3 e 4 de xaneiro, Teatro Colón) e Santiago de Compostela (17 de xaneiro, Auditorio de Galicia).
Ilusionismo e artes circenses
Reinventio combina números de ilusionismo, acrobacias e danza contemporánea nunha proposta de 90 minutos que aborda a ilusión, a superación e o espírito transformador do Camiño de Santiago. A dirección artística corre a cargo do ilusionista ferrolán Martín Varela, xunto coa coreógrafa Mercedes Suárez e a compañía Druida Danza, profesionais galegos de ampla traxectoria que integran elementos de danza clásica e contemporánea con técnicas circenses innovadoras, acompañadas dun coidado deseño escenográfico, musical e lumínico que reforza o carácter visual e emocional do espectáculo.
O director de Turismo de Galicia felicitou ao equipo artístico pola súa contribución á oferta turística e destacou que o apoio da Xunta a este tipo de proxectos forma parte da estratexia de promoción dun turismo que tamén xera oportunidades e pon en valor o talento galego. As entradas para o espectáculo están dispoñibles en www.reinventio.gal e www.ataquilla.com , con prezos entre 15 e 25 euros segundo o recinto.
O conselleiro de Presidencia, Xustiza e Deportes, Diego Calvo, informou esta mañá de que o Consello deu luz verde aos textos 'dos estatutos das mulleres do rural e do sector marítimo-pesqueiro de Galicia', que entran así na súa última fase de tramitación coa súa remisión ao Consello Consultivo para que emita o informe preceptivo 'e estean aprobados a finais de ano'. Este trámite, que coincide coas vésperas do Día Internacional das Mulleres Rurais -que se conmemora cada 15 de outubro- busca 'avanzar no recoñecemento das mulleres' destes eidos e 'mellorar o seu acceso a novas oportunidades e recursos'. Ambos documentos buscan ademais, tal e como explicou Calvo, visibilizar a súa contribución ao desenvolvemento territorial; garantir o seu acceso en igualdade a dereitos, oportunidades e recursos; fomentar a contratación feminina en profesións masculinizadas ou impulsar a titularidade compartida en explotacións e embarcacións.
A economía galega medrará catro décimas máis do previsto hai un ano, cando se elaboraron os orzamentos vixentes. Así se desprende do Informe sobre as previsións macroeconómicas que se incluirán nos orzamentos da Xunta de Galicia para o ano 2027, elaborado polo Instituto Galego de Estatística (IGE) e que hoxe foi avalado pola AIReF. Deste xeito, segundo constata o documento, Galicia medrará máis do previsto para este ano. Non en van, se en xullo, cando se aprobou o teito de gasto non financeiro, a Comunidade xa mellorou a previsión de crecemento que estaba nos orzamentos para este ano en dúas décimas, pasando do 1,9 % ao 2,1 %, agora volve a facelo, mellorando noutras dúas décimas (ata o 2,3 %) a previsión para o peche de 2026.
