miércoles, 30 de abril de 2025
O espazo compostelán recibe este mesmo mércores día 11, ás 20,00 h., a compañía lusa Teatro do Noroeste - Centro Dramático de Viana con Salgueiro Maia: cartografía de um monólogo, espectáculo escrito e interpretado por Ricardo Simões a partir da obra Capitão de abril: memórias da guerra do ultramar e do 25 de abril, de Salgueiro Maia.
Nesta peza, o capitán Salgueiro Maia, figura emblemática da Revolución dos Caraveis, comparte co público as súas memorias sobre os antecedentes dese suceso histórico, a guerra colonial e o proceso persoal que levou este militar de carreira excepcional a se rebelar contra o réxime do Estado Novo.
Autobús gratuíto ata Santiago
Para esta actividade, o centro Camões ofrece un servizo de autobús gratuíto desde Vigo ata Santiago de Compostela, con regreso incluído e paradas en Pontevedra e Vilagarcía de Arousa.
As Quintas do Camões continuarán xa en xaneiro, coa representación o día 10 de Frágua de amor, de Gil Vicente, coproducida polo Centro Dramático Galego xunto a seis estruturas culturais lusas: Escola da Noite-Grupo de Teatro de Coímbra, Artway, Cendrev-Teatro García de Resende, O Bando de Surunyo, Teatro Académico de Gil Vicente e Teatro Nacional São João.
Estrea da Aula de Teatro da USC
Esta semana, o Salón Teatro será tamén o escenario da estrea de Agamenón, volvín do supermercado e deille unha malleira ao meu fillo, a nova montaxe da Aula de Teatro da Universidade de Santiago de Compostela, que se representa na sede do Centro Dramático Galego o xoves 12, ás 21,00 h. A entrada é gratuíta previa recollida de localidades no despacho de billetes desde dúas horas antes do comezo da función.
A partir desta obra e doutros escritos do dramaturgo hispano-arxentino Rodrigo García, Roberto Salgueiro encárgase da posta en escena do espectáculo, cuxo elenco está formado por Antón Torrado Puime, Lucía Casal Muñiz e Laura Valeiras. Na peza convive unha mestura de violencia e humor, que serve de retrato dunha sociedade afeita a recibir o golpe e aceptar a derrota.
A Filmoteca de Galicia inicia en maio unha retrospectiva arredor do actor italiano Marcelo Mastroianni como parte dunha carteleira na que tamén sobresaen as visitas de dous destacados nomes do actual panorama cinematográfico estatal: Alauda Ruiz de Azúa e Albert Serra. A oferta mensual da cinemateca da Xunta arranca este venres 2 con Corazón Salvaje, que se exhibe na recta final da homenaxe que se lle está a dedicar ao director David Lynch tralo seu recente pasamento. A nova programación inclúe tamén un repaso ás tres longametraxes do cineasta galego Raúl Veiga e a habitual colaboración co festival Play-Doc de Tui, que desta volta pon o foco en dúas figuras do cinema independente norteamericano: Monte Hellman e Elaine May.
Ou Yeah! é unha nova iniciativa arraigada no territorio, comprometida coa súa xente e deseñada para proxectar Ourense ao mundo. A súa esencia é a transformación: do local ao global, do tradicional ao contemporáneo, do escenario ao prato, do concerto ao encontro. Deste xeito, o festival, que ten como columna vertebral o rock, entendido nun sentido amplo, plural e actual, conxuga música, gastronomía, identidade e impacto territorial. Ou Yeah! espallarase pola provincia de Ourense entre os meses de xullo e outubro de 2025. O primeiro concerto terá lugar na capital da provincia, na explanada de Expouerense, o sábado 12 de xullo, da man de bandas de referencia internacionais, nacionais e galegas como The Waterboys, Morgan, Escuchando Elefantes e Tesouro.
