domingo, 1 de noviembre de 2026
Nesa liña, Ángeles Vázquez insistiu na solicitude ao Ministerio para a Transición Ecolóxica e o Reto Demográfico de revisar o nivel de protección do lobo co fin de adaptalo á realidade actual en cada zona. Os datos do censo elaborado pola Xunta estiman que a poboación desta especie se mantén estable na Comunidade con arredor de 93 mandas, polo que o Goberno galego considera que estado do lobo non é desfavorable.
De feito, o Comité Permanente do Convenio de Berna do Consello de Europa aprobou hoxe mesmo a proposta adoptada polo Consello de Ministros da UE o pasado 26 de setembro, que avogaba por mudar o estatus internacional do lobo en Europa de estritamente protexido a protexido.
A conselleira considera que a decisión comunitaria avala a postura da Xunta, que sempre defendeu que foi un erro elevar o nivel de protección do lobo en España e que non respondía a criterios obxectivos nin ao seu estado favorable ao norte do río Douro.
Segundo aseverou, Ángeles Vázquez é necesario que o Goberno de España escoite ás autoridades europeas e rectifique unha decisión que xa está a dificultar o equilibrio entre a especie e o sector primario co que convive no medio rural.
Apoio ao sector gandeiro
Cómpre lembrar que o Goberno galego leva anos apoiando ao sector gandeiro coa convocatoria de axudas para paliar as consecuencias dos ataques do lobo e para implementar medidas preventivas como a compra de cans protectores, pastores eléctricos, cercados móbiles, instalación de valados fixos ou a contratación de coidadores para protexer o gando.
Así, no período 2016-2024 a Xunta destinou con fondos propios preto de 11 M a esta cuestión e ten o compromiso de manter e mesmo reforzar estes apoios no futuro. De feito, os orzamentos para 2025 inclúen unha partida de máis de 2,9 millóns de euros para esta cuestión. En concreto, o Goberno galego reserva máis de 910.000 euros para compensar os danos causados por ataques e algo máis de 2 millóns de euros para apoiar aos gandeiros na implantación de medidas de prevención.
Ademais, ao Goberno central aínda lle debe á Comunidade 8 millóns de euros nesta materia logo de ter transferido os 4 millóns de euros correspondentes o reparto acordado na Conferencia Sectorial de Medio Ambiente celebrada o pasado mes de xullo.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
