miércoles, 30 de abril de 2025
A directora xerente da Fundación Cidade da Cultura, Ana Isabel Vázquez, participou xunto coas artistas seleccionadas nunha xornada aberta ao público para mostrar o traballo desenvolvido neste meses de estadía no Gaiás. Durante o acto, subliñou o compromiso do Goberno galego para manter e fortalecer o apoio a creadoras e creadores, convertendo o Gaiás non só nun espazo privilexiado para a exhibición artística, senón tamén nun auténtico viveiro de proxectos culturais.
Cada iniciativa seleccionada nas Axudas das Residencias Artísticas do Gaiás recibiu unha achega económica de 8.000 euros e contou co acompañamento dunha persoa mentora experta, así como cos espazos, recursos e equipos técnicos da Cidade da Cultura para o seu desenvolvemento.
Un manual de navegación musical
Pablo Seoane e Macarena Montesinos abriron as presentacións na mañá do venres con Exercicios sonoros de cartografía inversa, un concerto singular no que usaron como partitura a ruta trazada sobre unha carta náutica da costa de Ferrol. No transcurso da súa residencia, ambos músicos desenvolveron un manual que traduce as coordenadas, as mareas, a profundidade das augas, os naufraxios, faros e liñas de costa a matices musicais como notas, tempo, dinámicas e harmonías.
Este libro de instrucións naceu da investigación sobre a cartografía mariña que conserva a Biblioteca Dixital de Galicia desde o século XVII aos nosos días, e está pensado para que calquera persoa con coñecementos musicais poida usalo para ler e trazar rutas no océano como composicións musicais. O proxecto contou coa mentoría de Beatriz R. Fontán.
O artista multidisciplinar Sergio Marey presentou en formato de performance e instalación o seu proxecto Deus te livre, que contou co acompañamento de Edu Valiña. Unha manta que entretece con fío de chourizos e lá retallos da súa biografía persoal e da de Fernando Pessoa presidiu o espazo escénico desta orixinal proposta. Nela, Marey reimaxina a figura do poeta luso como persoa non binaria, facendo fincapé nas conexións históricas, culturais, lingüísticas e incluso espirituais que comparten Galicia e Portugal, ao tempo que reivindica o rural como un espazo de liberdade para as persoas LGBTI+.
Teatro de cartón á busca de novos fogares
A presentación dos proxectos completouse na tarde coa obra teatral Ca-Co-Flex!, de Isabel Fernández e o Téxtil suspendido da deseñadora de moda María Barros. A primeira é unha obra en construción que emprega os triángulos de cartón como elemento poético e escenográfico para falar da problemática de acceso á vivenda nas xeracións máis novas.
Entrelazando o íntimo co colectivo, e sen desbotar o humor, a obra supón o primeiro traballo dun equipo formado pola directora Isabel Fernández coa artesá Julia Marín e as actrices e actores Ziggi Iglesias, Alixa Ladson, Mateo Rodríguez, Lúa Pagán e Hugo González, que recibiu o apoio do actor e dramaturgo Santiago Cortegoso.
Pola súa parte, María Barros deu a coñecer a serie de figuras escultóricas, realizadas en seda e algodón, ás que deu forma empregando técnicas de alta costura e coa dificultade engadida de non usar como soporte o armazón corporal dun manequín. A artesá e escultora Mercedes Vicente foi a mentora do proxecto.
A Filmoteca de Galicia inicia en maio unha retrospectiva arredor do actor italiano Marcelo Mastroianni como parte dunha carteleira na que tamén sobresaen as visitas de dous destacados nomes do actual panorama cinematográfico estatal: Alauda Ruiz de Azúa e Albert Serra. A oferta mensual da cinemateca da Xunta arranca este venres 2 con Corazón Salvaje, que se exhibe na recta final da homenaxe que se lle está a dedicar ao director David Lynch tralo seu recente pasamento. A nova programación inclúe tamén un repaso ás tres longametraxes do cineasta galego Raúl Veiga e a habitual colaboración co festival Play-Doc de Tui, que desta volta pon o foco en dúas figuras do cinema independente norteamericano: Monte Hellman e Elaine May.
Ou Yeah! é unha nova iniciativa arraigada no territorio, comprometida coa súa xente e deseñada para proxectar Ourense ao mundo. A súa esencia é a transformación: do local ao global, do tradicional ao contemporáneo, do escenario ao prato, do concerto ao encontro. Deste xeito, o festival, que ten como columna vertebral o rock, entendido nun sentido amplo, plural e actual, conxuga música, gastronomía, identidade e impacto territorial. Ou Yeah! espallarase pola provincia de Ourense entre os meses de xullo e outubro de 2025. O primeiro concerto terá lugar na capital da provincia, na explanada de Expouerense, o sábado 12 de xullo, da man de bandas de referencia internacionais, nacionais e galegas como The Waterboys, Morgan, Escuchando Elefantes e Tesouro.
