sábado, 7 de noviembre de 2026
Así o sinalou o director do Centro Dramático Galego, Fran Núñez, quen participou hoxe canda a Xaquín López, director-xerente do Auditorio de Galicia, e Nuno Cardoso, actual director artístico do São João, na rolda de prensa sobre o espectáculo, unha proposta que forma parte á súa vez da Temporada cruzada-Programação Cultural Portugal-Espanha-50 anos de democracia, promovida polos gobernos de España e Portugal e outros organismos.
Núñez lembrou que nos últimos anos o Centro Dramático Galego ten colaborado con estruturas públicas portuguesas como o Teatro Nacional Dona Maria II e o propio Teatro Nacional São João, para levar a escena coproducións como Manuela Rey Is In Da House, estreada en Galicia o pasado mes de marzo, e de Frágua de amor, do dramaturgo portugués Gil Vicente, que se está montar con seis entidades culturais lusas e que verá a luz en novembro. Dentro desta cooperación enmárcanse tamén os traballos desenvolvidos ao abeiro do proxecto europeo Nós/Nous, que impulsa a promoción profesional e a internacionalización do alumnado de arte dramática ao final da súa carreira académica, e que posibilitou as montaxes de espectáculos como Na hora dos cans ou Ifixenia.
Un clásico de plena actualidade
Con esta revisión do texto do dramaturgo e guionista estadounidense Arthur Miller, Nuno Cardoso continúa a súa investigación sobre os fundamentos da vida comunitaria, realizando un novo ensaio sobre a cegueira do home social. Miller escribira a súa peza de teatro en 1952 a partir dos feitos que rodearon os xuízos de bruxas na pequena comunidade americana do pobo de Salem, Massachusetts, en 1692, como unha alegoría da febre persecutoria e represión anticomunista durante a época macarthista da década dos 50 que tamén acabou afectando ao propio autor da obra, acusado polo cineasta Elia Kazan. Dende o epicentro da trama presentada como unha fascinación primaria pola paranoia, que sacrifica individuos na súa furia colectiva Cardoso consegue descubrir na obra un caldo letal de sexualidade ilícita, medo ao sobrenatural e manipulación política, que resoan con plena vixencia no momento actual.
Pedro Nunes figura como axudante de dirección desta peza que ten no seu elenco a Ana Brandão, Carolina Amaral, Joana Carvalho, Jorge Mota, Lisa Reis, Mário Santos, Nuno Nunes, Paulo Freixinho, Patrícia Queirós, Pedro Frias e Sérgio Sá Cunha. A tradución é de Fernando Villas-Boas, a escenografía corre a cargo de F. Ribeiro; o deseño de luz asínao Nuno Meira; a música e o deseño de son, João Oliveira; Roldy Harris é o responsable do movemento e o equipo do Teatro Nacional São João, da elaboración do vestiario.
Ademais do da unidade teatral da Xunta de Galicia, a produción conta cos apoios do Gobierno de España, a través do Ministerio de Memoria Democrática, Acción Cultural Española, AECID e o Instituto Cervantes; do Governo da República Portuguesa a través dos departamentos de Negócios Estranxeiros e Cultura, do Gabiente de Estratégia, Planeamento e Avaliação Culturais GEPAC, a Embaixada de Portugal en Madrid, Cultura Portugal, Instituto Camões, Unión de Teatros de Europa, e Portugal-Espanha 50 anos Cultura e Democracia.
As bruxas de Salem é un espectáculo de gran formato e de 155 minutos de duración, que se representa en portugués con sobretítulos. Tralo seu paso por Santiago de Compostela, viaxará dentro deste ano ao Yugoslav Drama Theatre, en Belgrado (Serbia) e ao Teatro Municipal São Luiz de Lisboa.
As localidades para asistir á función do sábado no Auditorio de Galicia están á venda a través das canles habituais de Compostela Cultura.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
