lunes, 18 de mayo de 2026
O director xeral de Cultura, Anxo M. Lorenzo, participou hoxe na presentación da VI edición do Nortear Ilustrado San Simón, onde destacou a aposta do Goberno galego por seguir fortalecendo os vínculos culturais entre Galicia e o Norte de Portugal. Esta residencia artística celébrase desde o martes ata mañá na illa redondelá, sumándose unha xornada máis respecto ás anteriores estadías.
O representante da Consellería de Cultura, Lingua e Xuventude puxo en valor a gran variedade de propostas que se levan a cabo neste enclave e que promoven actividades relacionadas coa arte, a literatura ou a tradución. Neste senso, salientou que esta iniciativa, baixo o lema de traballo A libreta como laboratorio de ideas, afondará na creación artística no ámbito da ilustración e o deseño gráfico.
Con artistas recoñecidos
Esta edición, que comezou onte, está coordinada polo multipremiado docente e ilustrador de libros infantís, Federico Fernández, e reúne a catro profesionais recoñecidos dentro do mundo da creación. No caso dos participantes de orixe galego está o artista polifacético Ramón Trigo (Vigo, 1965), e a ilustradora Pepa Prieto (Santiago de Compostela, 1989), que traballou para The New York Times e acaba de lanzar o seu primeiro cómic.
En representación de Portugal participan a artista contemporánea Ana Almeida (Sintra, 1959), especializada na pintura en tea e na dixital, e Firoozeh Zadeh (Irán, 1987), profesional de orixe persa que pinta con diferentes materiais e sobre diversos soportes.
Durante as catro xornadas, unha mais que nas edicións anteriores, os profesionais realizaron diversas actividades co propósito de fortalecer o coñecemento mutuo do sector e producir obra plástica orixinal inspirada na illa empregando como soporte a libreta Moleskine e, como materiais, lapis de grafito e acuarelas. Como resultado da súa estancia nesta residencia artística, producirán cadanseu caderno de autor, que se sumarán á colección de materiais xerados en anteriores edicións e que serán expostos nunha mostra.
Ademais estarán presentes tres grupos de estudantes procedentes das Escolas de Arte e Superiores de Deseño Pablo Picasso da Coruña, Antonio Faílde de Ourense e Ramón Falcón de Lugo, que terán a oportunidade de coñecer de primeira man a traxectoria profesional dos creadores convidados e de compartir con eles un espazo de conversa e debate.
Esta residencia encádrase no programa de intercambio cultural entre Galicia e Portugal Nortear, que ten como entidades promotoras a Consellería de Cultura, Lingua e Xuventude e a Comisión de Coordinación e Desenvolvemento Rexional do Norte (CCDR-N), liderados pola Agrupación Europea de Cooperación Territorial de GaliciaNorte de Portugal (GNPAECT).
Un total de 596 centros de Primaria e Secundaria de toda Galicia van participar o vindeiro curso no programa de ensino híbrido E-Dixgal. A Consellería de Educación, Ciencia, Universidades e FP incorpora á iniciativa, a petición dos centros, dous colexios e deciden saír outros tres, de xeito voluntario. En concreto, os centros de nova incorporación son os colexios CEIP de Castrelo de Miño (Castrelo de Miño, Ourense) e o CEIP de Valeixe (A Caniza, Pontevedra). No que atinxe ás renuncias, son as do CEIP de Zalaeta (A Coruña), CEIP Península da Paz (Cervo) e a do Instituto Martaguisela (O Barco).
Durante seis días do mes de setembro, a cidade de Vigo acollerá un ciclo de concertos único que reunirá diferentes xeracións, estilos musicais e públicos nunha contorna privilexiada: o peirao de transatlánticos do Porto de Vigo, un espazo aberto ao Atlántico e situado en pleno corazón da ría de Vigo. Son e Mar combina música, identidade cultural e experiencia colectiva nunha programación pensada para todos os públicos. Ao longo do ciclo, preto de 50 artistas pasarán polo escenario principal e espérase unha asistencia superior ás 35.000 persoas entre todos os eventos programados.
