domingo, 1 de noviembre de 2026
De feito, tendo en conta os valores rexistrados nas estacións meteorolóxicas máis representativas, hai que remontarse ao ano 2017 para atopar un setembro máis frío na Comunidade.
O período caracterizouse pola chegada a Galicia de borrascas frías e activas para esta época do ano durante a primeira e última semana do mes, xa que aínda que as semanas intermedias foron algo máis secas e cálidas, non foron suficientes para compensar as anomalías coas que comezou e rematou setembro.
Así mesmo, foi un mes moi húmido en todo o territorio galego e estivo marcado tamén polo río atmosférico que, entre os días 25 e 26 de setembro, cruzou a Comunidade, deixando ao seu paso grandes cantidades de auga.
Cómpre subliñar, en todo caso, as precipitacións acumuladas ao longo das serras litorais (entre os 240 e 320 litros por metro cadrado) con rexistros máximos por riba dos 400 L/m2 no caso da Serra do Suído; mentres que no extremo contrario, os acumulados menos importantes oscilaron entre os 40 e os 70 L/m2 en áreas da Mariña lucense central e oriental, nos arredores da ría de Camariñas e na comarca da Coruña.
Por último e respecto ao comportamento dos termómetros, os datos obtidos a partir das estacións máis representativas de Galicia reflicten que a temperatura media en setembro se situou 1 grao por debaixo do agardado época do ano, aínda que no caso das máximas esta anomalía foi incluso maior, cunha desviación de -1,5 graos.
En xeral, a temperatura media estivo no conxunto da Comunidade por debaixo do que cabería agardar nesta época do ano debido ao predominio dos períodos fríos; de feito, tan só houbo un pequeno período, entre os días 14 e 18, que se pode considerar cálido na meirande parte de Galicia.
Por áreas xeográficas, as anomalías máis altas das temperaturas medias (de entre -0,1 graos e +0,4 graos) concentráronse en puntos da Chaira de Bergantiños, da ría do Burgo ou do extremo suroeste da provincia de Pontevedra, mentres que as desviacións negativas máis acusadas (entre -1,8 e -1,4 graos) se localizaron en áreas do leste e sueste da provincia de Lugo.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
