viernes, 14 de agosto de 2026
A Estrada acolle este sábado, día 5, a cuarta edición do festival de danza e artes do movemento 6coreógrafas, que volve contar coa colaboración da Xunta de Galicia para desenvolver un cartel que inclúe catro espectáculos galegos e dous obradoiros. O encontro foi presentado esta mañá no Teatro Principal da vila, polo director da Axencia Galega das Industrias Culturais, Jacobo Sutil, nunha cita na que Ana Beatriz Pérez, da compañía galego-cubana La Guajira, realizou un solo de danza para un grupo de escolares, como actividade previa dun programa que ten como obxectivo achegar esta disciplina á cidadanía e facela partícipe tanto das últimas propostas das compañías como do propio acto de bailar.
Así o remarcou o representante da Consellería de Cultura, Lingua e Xuventude, que estivo na presentación xunto a directora artística do festival, Paula Quintas, e a concelleira de Cultura da Estrada, Lucía Seoane. Sutil celebrou a continuidade desta programación que o Goberno galego volve apoiar en liña cos obxectivos marcados no Plan Integral para a Danza de Galicia e que se suma a outras iniciativas de apoio a esta disciplina, como a liña de axudas para a creación de danza, as coproducións co Centro Coreográfico Galego ou a contribución ao desenvolvemento de proxectos como o festival Abanea, as residencias Paraíso e Atopémonos bailando ou TRC Danza.
Discoteca de señoras e técnica waacking
O programa desta edición abrirase con dous obradoiros, un deles creado precisamente en colaboración co TRC Danza, iniciativa do Teatro Rosalía Castro da Coruña como actividade de mediación baixo o suxestivo título Discoteca de señoras. A bailarina e coreógrafa Marta Alonso será a anfitrioa dunha pista de baile que convida á reflexión sobre os espazos para seguir bailando a medida que pasan os anos a través do encontro, o xogo, a pose e a experimentación, con elementos como un gran ventilador de aire que move as roupas das participantes. Será de 13,00 a 14,00 h. na sesión vermú da praza do Mercado de Abastos.
Antes, a compañía Elahood dirixirá dous obradoiros de Waacking_Danza Club na alameda municipal, o primeiro de 10,00 h. a 11,00 h. para a cativada de 7 a 12 anos, e un segundo de 11,00 h. a 12,00 h. para mocidade de 12 a 18 anos. O waacking é un estilo de baile que se orixinou a principios da década de 1970 na costa oeste dos Estados Unidos dentro da comunidade gai afroamericana e latina, nas discotecas onde empezaba a soar o música disco. Dada a situación marxinal que sufría este grupo neste momento histórico, se utilizou a danza como método de liberación e expresión da individualidade.
Un escaparate de danza galega
O programa de espectáculos desenvolverase no mesmo recinto da alameda e abrirase coa proposta Intempestiva, unha peza de Elahood inspirada na obra e na figura da escritora Xela Arias como retrato en movemento da axitación creativa das novas xeracións para cuestionar que significa facer algo de proveito. A creación recibiu o Primeiro Premio e Premio da Crítica no Certamen Coreográfico de Madrid (2021), e o premio a Mellor Espectáculo na Plataforma Diálogos Contemporáneos do Festival DZM de Cáceres.
A segunda proposta da xornada será Mesura, na que Raquel Ferradás aborda a pescuda do equilibrio nunha vida en constante cambio, baixo a produción de Amarelo e Manu Lago e en coprodución coa Xunta de Galicia a través do Centro Coreográfico Galego.
A continuación, Minguantes, de La Guajira, amosará o universo temporal de dúas persoas que van envellecendo desde unha perspectiva minimalista e futurista.
Pechará o festival a preestrea do novo espectáculo de Marta Alonso, Dance Join, aínda en proceso de creación, convidando ao público a unirse ao baile cunha proposta interactiva de danza mesturada co traballo de clown.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
