domingo, 25 de octubre de 2026
Na visita á libraría Escolma, de Pontevedra, o Conselleiro de Educación, Ciencia, Universidades e FP, Román Rodríguez, destacou o reforzo do apoio da Xunta ás familias no inicio do curso escolar xa que "o Goberno galego conta cunha batería de medidas grazas ás que se facilita a volta ás aulas aos fogares e se promove a igualdade de oportunidades no acceso ao ensino". Inclúen tanto a matrícula universitaria gratuíta, que se estrea por primeira vez este ano académico, como as axudas para a adquisición de libros de texto e de material, a conxelación dos prezos dos comedores ou o préstamo de ordenadores, detallou.
O titular do departamento educativo da Xunta lembrou que este é o primeiro ano no que a Administración autonómica facilita a matrícula universitaria sen custo ao longo de toda a carreira, unha medida pioneira cun aforro medio de 3.000 euros por fillo. "Isto convértenos na única Comunidade onde o acceso a todo o ensino é de balde, desde as escolas infantís ata a obtención dun título universitario ou de FP!, afirmou.
Así mesmo, o Goberno galego blinda o programa para o acceso a libros de texto e material, un modelo que, xunto co libro dixital de préstamo tamén gratuíto, beneficia a sete de cada 10 alumnos e supón un aforro de 100M euros aos fogares. No caso do material consolídanse os dous vales, de 75 e 60euros, en función da renda. Ademais, hai axudas de entre 160 e 300 euros para a compra de manuais nos cursos nos que estes non son reutilizables, é dicir, para os alumnos dos dous primeiros cursos de Primaria, os de Educación Especial e para aqueles con necesidades específicas de apoio educativo.
A maiores, o Fondo solidario conta este curso con máis de 400.000 libros, que se repartirán en réxime de préstamo entre o alumnado desde 3º de Primaria a 4º de ESO. "A Xunta fixo un investimento de máis de 25M euros nos dous últimos anos na adquisición destes manuais para ceder aos alumnos gratuitamente, logo de que o Goberno central cambiase a lei educativa e os anteriores xa non servisen", sinalou Román Rodríguez.
Transporte escolar gratuíto
O conselleiro recordou, ademais, que o servizo de transporte escolar é totalmente gratuíto e que Galicia conta cun dos servizos de comedor máis equitativos, de tal forma que o 80% de usuarios dos comedores da Xunta teñen o servizo de balde ou pagan só 1 euro. Este servizo volverá a ter os prezos conxelados, polo que a Consellería asume o incremento do custo dos alimentos e a enerxía para que non repercuta nas familias.
"Galicia quere seguir sendo unha das comunidades que maiores facilidades ofrece aos alumnos e ás súas familias para acceder ao ensino e para adquirir material educativo, polo que seguiremos traballando para consolidade un modelo equitativo, universal e aberto", recalcou o conselleiro na súa visita á libraría pontevedresa.
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
