sábado, 7 de noviembre de 2026
A Xunta de Galicia impulsará os novos espectáculos de danza de Sólodos (Maruxa Salas e Erick Jiménez), Kirenia Martínez e Daniel Rodríguez a través de tres contratos en réxime de coprodución co Centro Coreográfico Galego.
Na modalidade de compañías consolidadas, cunha antigüidade de cinco anos, as pezas Mover cenizas, de Sólodos, e Cicatriz (título provisional), de Kirenia Martínez, presentada por Artestudio Xestión Cultural, reciben 29.970 euros e 19.855 euros respectivamente. Na categoría de profesionais emerxentes, con menos dun lustro de traxectoria, a proposta seleccionada foi Transeúnte, de Daniel Rodríguez, con 26.646 euros para a súa posta en escena.
Na convocatoria deste ano introducíronse como criterios de avaliación as medidas que conectan cos obxectivos do Plan Integral para a Danza de Galicia e a futura Lei de cultura inclusiva e accesible de Galicia, como son a adaptación a espazos non convencionais, a profesionalización da danza tradicional, a participación de persoas con discapacidade, a visibilidade da danza nos medios de comunicación ou o fomento da asistencia de público familiar e xuvenil.
O obxectivo deste programa de coproducións, promovido por oitavo ano consecutivo, é favorecer a produción de danza en todas as súas modalidades, impulsar a creación de espectadores para esta disciplina escénica e consolidar produtos culturais competitivos que xeren retorno. Entronca, neste sentido, cos obxectivos recollidos no Plan Integral para a Danza de Galicia, elaborado pola Xunta a partir dun proceso participativo co sector.
Mover cenizas
Despois dunha longa temporada sen novas creacións, Sólodos, a compañía de Maruxa Salas e Erick Jiménez, presenta Mover cenizas, unha peza de rúa cunha duración de 20 minutos inspirada nos incendios que asolaron Ourense en 2006 e que deixaron unha profunda pegada na coreógrafa. A compañía retoma un tema xa tratado en Vacuo, primeira produción propia do Centro Coregráfico Galego estreada en xaneiro do 2007. Para este novo espectáculo, cóntase coa asistencia do coreógrafo catalán Arnau Pérez de la Fuente e a composición musical do ourensán John Axiom.
Cicatriz
Presentada por Artestudio Xestión Cultural, Cicatriz é unha peza para sala e espazos non convencionais. O proxecto xorde da experiencia da coreógrafa Kirenia Martínez en Afectos, coproducida polo Centro Coreográfico Galego na convocatoria de 2022, onde explorou a intersección entre a danza e a poesía a través dos poemas de Antón Reixa. Esta nova peza, que será interpretada xunto co propio Reixa, destaca pola súa integración de técnicas de danza, teatro, performance, poesía, instalación e música, situando a danza e a poesía como piares fundamentais. A idea é potenciar a presenza e participación de persoas con discapacidade no equipo e promover actividades inclusivas no eido da danza. Ademais, desta peza resultará un proxecto audiovisual paralelo, que non só documentará o proceso creativo senón que afondará nas historias persoais e nos conflitos emocionais dos seus protagonistas.
Transeúnte
Finalmente, Transeúnte leva a firma de Daniel Rodríguez, unha das promesas da danza de Galicia, con varios premios pola súa primeira peza A raíz de. Bailarín e coreógrafo, participa habitualmente nas compañías de Daniel Abreu e de Fran Sieira. En Transeúnte, o creador busca un diálogo interxeracional, mesturando tradición e actualidade a través do canto, a música e o baile tradicional. Para o desenvolvemento deste proxecto, que presentou en formato pitching en Galicia Escena PRO 2024, conta coa participación na música de Aida Tarrío, das Tanxugueiras, e do percusionista Artur Puga, que colabora con Mondra, e de Sheila Pérez no deseño de vestiario.
Dique
Ademais de poñer en marcha estas tres pezas, que se estrearán antes do 31 de marzo de 2025, o Centro Coreográfico coproduce este ano Dique, de Nova Galega de Danza, que resultou adxudicataria na convocatoria para espectáculos de gran formato lanzada en 2023. Estreada o pasado 21 de xuño no Salón Teatro, Dique pon en diálogo a danza contemporánea e a danza tradicional galega nunha conversa que reflicte a conexión entre o pasado e o presente. Con dirección escénica de Marta Pazos, oito bailarinas en escena e un equipo artístico integramente feminino, a peza recupera a historia esquecida das máis de 200 mulleres que participaron na construción do Dique da Campá de Ferrol. A vindeira función da compañía será o vindeiro 19 de xullo como espectáculo inaugural da 40ª Mostra Internacional de Teatro de Ribadavia.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
